ایرانی تجارتی جہاز پر حملہ، امریکا نے جنگ بندی کی خلاف ورزی کی: ایرانی فوج

(تہران) ایرانی فوج نے امریکی کارروائی کو جنگ بندی کی خلاف ورزی قرار دیتے ہوئے کہا ہے کہ خلیج عمان میں ایرانی تجارتی بحری جہاز پر حملہ کیا گیا جس کا جواب جلد دیا جائے گا۔

ایرانی فوجی ہیڈکوارٹرز کے مطابق امریکا نے ایرانی پرچم والے تجارتی جہاز کے نیوی گیشن سسٹم کو غیر فعال کیا اور بعد ازاں اہلکاروں کو جہاز میں اتار کر اسے اپنے کنٹرول میں لینے کی کوشش کی۔

ایرانی فوج کا کہنا ہے کہ یہ کارروائی خلیج عمان میں کھلی بحری قزاقی کے مترادف ہے اور یہ اقدام بین الاقوامی قوانین اور جاری جنگ بندی معاہدے کی واضح خلاف ورزی ہے۔

ایرانی فوجی حکام نے خبردار کیا کہ تجارتی بحری جہاز پر حملے کا مناسب وقت پر بھرپور جواب دیا جائے گا۔ ان کا کہنا تھا کہ ایران اپنی سمندری حدود اور قومی مفادات کے تحفظ کیلئے ہر ممکن اقدام کرے گا۔

ایرانی حکام کے بیان کے بعد خطے میں کشیدگی مزید بڑھنے کا خدشہ ظاہر کیا جا رہا ہے جبکہ عالمی سطح پر اس صورتحال پر گہری نظر رکھی جا رہی ہے۔