وزیراعظم شہباز شریف کا ایرانی صدر مسعود پزشکیان سے ٹیلیفونک رابطہ

(اسلام آباد) وزیراعظم شہباز شریف اور ایران کے صدر ڈاکٹر مسعود پزشکیان کے درمیان ٹیلیفونک رابطہ ہوا، جس میں خطے کی موجودہ صورتحال اور امن کوششوں پر تفصیلی تبادلہ خیال کیا گیا۔

ذرائع کے مطابق تقریباً 45 منٹ جاری رہنے والی اس خوشگوار اور دوستانہ گفتگو کے دوران دونوں رہنماؤں نے خطے میں امن و استحکام کے لیے جاری سفارتی کوششوں کا جائزہ لیا۔

وزیراعظم شہباز شریف نے اسلام آباد مذاکرات میں شرکت پر صدر پزشکیان اور ایرانی قیادت کا شکریہ ادا کیا۔ انہوں نے سعودی عرب، قطر اور ترکیہ سمیت مختلف عالمی رہنماؤں سے حالیہ ملاقاتوں سے بھی ایرانی صدر کو آگاہ کیا۔

وزیراعظم نے فیلڈ مارشل عاصم منیر کے دورۂ تہران کے دوران ایرانی قیادت کی جانب سے تعمیری بات چیت پر شکریہ ادا کیا اور ایرانی سپریم لیڈر آیت اللہ مجتبیٰ خامنہ ای کے لیے نیک تمناؤں کا اظہار بھی کیا۔

وزیراعظم شہباز شریف کا کہنا تھا کہ حالیہ سفارتی روابط خطے میں پائیدار امن کے قیام کے لیے اتفاق رائے پیدا کرنے میں معاون ثابت ہوئے ہیں۔ انہوں نے اس عزم کا اعادہ کیا کہ پاکستان خطے میں امن و استحکام کے لیے سنجیدہ کوششیں جاری رکھے گا۔

ایرانی صدر ڈاکٹر مسعود پزشکیان نے وزیراعظم شہباز شریف اور فیلڈ مارشل عاصم منیر کی امن کوششوں اور مضبوط عزم کو سراہتے ہوئے شکریہ ادا کیا۔ انہوں نے کہا کہ ایران اور پاکستان کے درمیان تعلقات آئندہ دنوں میں مزید مضبوط ہوں گے۔

واضح رہے کہ امریکا اور ایران کے درمیان مذاکرات کا دوسرا دور اسلام آباد میں متوقع ہے، جس کے لیے تیاریاں حتمی مراحل میں داخل ہو چکی ہیں۔ امریکی صدر ڈونلڈ ٹرمپ نے اعلان کیا ہے کہ ان کے نمائندے کل شام تک اسلام آباد پہنچ جائیں گے، تاہم ایرانی میڈیا کے مطابق ایرانی حکومت نے تاحال پاکستان وفد بھیجنے کے حوالے سے حتمی فیصلہ نہیں کیا۔