ایران سے مقابلہ ختم نہیں ہوا، کسی بھی وقت نئی پیش رفت ہو سکتی ہے: نیتن یاہو

(تل ابیب) اسرائیلی وزیراعظم نیتن یاہو نے کہا ہے کہ ایران کے ساتھ مقابلہ ابھی ختم نہیں ہوا اور کسی بھی وقت نئی پیش رفت سامنے آ سکتی ہے۔

غیر ملکی میڈیا کے مطابق نیتن یاہو نے مقبوضہ بیت المقدس میں ارجنٹائن کے صدر حاوییر ملی سے ملاقات کے دوران صحافیوں سے گفتگو کرتے ہوئے کہا کہ اسرائیل ایران کے ساتھ حالت جنگ میں ہے اور صورتحال ابھی مکمل طور پر ختم نہیں ہوئی۔

انہوں نے کہا کہ خطے میں کشیدگی برقرار ہے اور کسی بھی لمحے نئی پیش رفت ہو سکتی ہے، اسرائیل اپنی سکیورٹی کے حوالے سے مکمل طور پر تیار ہے۔

اسرائیلی وزیراعظم کے یہ بیانات ایسے وقت میں سامنے آئے ہیں جب امریکی صدر ڈونلڈ ٹرمپ نے اعلان کیا ہے کہ امریکی نائب صدر جے ڈی وینس مذاکرات کے اگلے دور میں پاکستان میں امریکی وفد کی قیادت کریں گے تاکہ ایران کے ساتھ جنگ کے خاتمے کے حوالے سے بات چیت کی جا سکے۔

امریکی صدر ڈونلڈ ٹرمپ نے کہا کہ وہ بدھ کو جنگ بندی کی مدت ختم ہونے سے پہلے ایران کے ساتھ مذاکرات کے لیے اسلام آباد میں اپنا وفد بھیج رہے ہیں۔ تاہم انہوں نے تہران پر آبنائے ہرمز میں موجودہ جنگ بندی معاہدے کی خلاف ورزی کا الزام بھی عائد کیا۔

ٹرمپ نے ایران کو سخت وارننگ دیتے ہوئے کہا کہ اگر جنگ کے حتمی خاتمے کا معاہدہ نہ ہوا تو امریکہ ایران کے پاور اسٹیشنز اور پلوں کو نشانہ بنا سکتا ہے۔

خطے میں بڑھتی کشیدگی اور ممکنہ مذاکرات کے باعث عالمی سطح پر صورتحال پر گہری نظر رکھی جا رہی ہے، جبکہ پاکستان میں متوقع مذاکرات کو اہم سفارتی پیش رفت قرار دیا جا رہا ہے۔