صدر پی ٹی آئی خیبرپختونخوا جنید اکبر گلگت بلتستان سے صوبہ بدر

(گلگت) صدر پاکستان تحریک انصاف خیبرپختونخوا جنید اکبر خان کو گلگت بلتستان سے صوبہ بدر کر دیا گیا، جبکہ پارٹی کے دیگر رہنماؤں کو بھی علاقے سے نکالنے کے احکامات جاری کیے گئے ہیں۔

ذرائع کے مطابق اراکینِ قومی اسمبلی سلیم الرحمٰن، سید محبوب شاہ، ڈاکٹر امجد علی خان اور ایم پی اے نعیم خان کو بھی صوبہ بدر کیا گیا ہے۔

صوبہ بدر کیے جانے کے بعد کارکنوں سے خطاب کرتے ہوئے جنید اکبر خان نے کہا کہ وہ امن و امان کی صورتحال برقرار رکھنے کے لیے فی الحال علاقے سے جا رہے ہیں، تاہم اگر کسی دوسری جماعت کا رہنما انتخابی مہم کے لیے آیا تو وہ دوبارہ واپس آئیں گے۔

انہوں نے کہا کہ پورے گلگت بلتستان کی پولیس بھی آ جائے تو وہ اپنے مؤقف سے پیچھے نہیں ہٹیں گے اور دوبارہ واپسی کریں گے۔

پی ٹی آئی رہنماؤں کی صوبہ بدری کے فیصلے کے بعد سیاسی حلقوں میں نئی بحث شروع ہو گئی ہے، جبکہ پارٹی کارکنوں کی جانب سے بھی اس اقدام پر شدید ردعمل سامنے آ رہا ہے۔

دوسری جانب حکومتی ذرائع کا کہنا ہے کہ یہ اقدامات علاقے میں امن و امان کی صورتحال کو برقرار رکھنے کے لیے کیے گئے ہیں۔