امریکہ اور ایران معاہدے کے قریب، مگر ٹرمپ ابھی دستخط کیلئے تیار نہیں: جے ڈی وینس

واشنگٹن: امریکی نائب صدر جے ڈی وینس نے کہا ہے کہ امریکہ اور ایران کے درمیان ممکنہ معاہدے کے حوالے سے اہم پیشرفت ہوئی ہے، تاہم صدر ڈونلڈ ٹرمپ ابھی کسی معاہدے پر دستخط کرنے کیلئے تیار نہیں ہیں۔

صحافیوں سے گفتگو کرتے ہوئے جے ڈی وینس نے بتایا کہ واشنگٹن اور تہران معاہدے کے بہت قریب پہنچ چکے ہیں، جبکہ دونوں فریقین کے درمیان چند شرائط اور الفاظ پر بات چیت جاری ہے۔ انہوں نے کہا کہ مذاکرات میں مثبت پیشرفت دیکھنے میں آئی ہے اور امید ہے کہ جلد ایسا وقت آئے گا جب صدر ٹرمپ معاہدے کی توثیق کر سکیں گے۔

انہوں نے مزید کہا کہ ابھی معاملہ مکمل طور پر حتمی مرحلے میں داخل نہیں ہوا اور بعض اہم نکات پر تبادلہ خیال باقی ہے۔ نائب صدر کے مطابق امریکہ اس پوزیشن میں موجود ہے کہ وہ ایران کے جوہری پروگرام کو پیچھے دھکیلنے کی صلاحیت رکھتا ہے۔

یہ بیان ایسے وقت میں سامنے آیا ہے جب امریکا اور ایران کے درمیان ایک جانب سفارتی رابطے جاری ہیں جبکہ دوسری جانب خطے میں کشیدگی اور غیر یقینی صورتحال بھی برقرار ہے۔ مبصرین کے مطابق دونوں ممالک کے درمیان جاری مذاکرات مشرق وسطیٰ کی سیاسی صورتحال پر گہرے اثرات مرتب کر سکتے ہیں۔