کور کمانڈرز کانفرنس - سعودی عرب پر حملوں کی شدید مذمت، کشیدگی پر تشویش کا اظہار

(راولپنڈی) کانفرنس میں کہا گیا کہ اس نوعیت کے حملے جاری سفارتی کوششوں کو نقصان پہنچا رہے ہیں اور امن کے قیام میں رکاوٹ بن سکتے ہیں۔ کانفرنس کے شرکاء نے اس بات پر زور دیا کہ سعودی عرب نے حالیہ اشتعال انگیزیوں کے باوجود تحمل اور ذمہ دارانہ رویہ اختیار کیا، جو خطے میں کشیدگی کم کرنے کے لیے اہم ہے۔

فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز کی زیر صدارت 274ویں کور کمانڈرز کانفرنس منعقد ہوئی جس میں قومی سلامتی، دہشت گردی کے خلاف اقدامات اور علاقائی صورتحال پر تفصیلی غور کیا گیا۔

کانفرنس کے آغاز میں مسلح افواج، قانون نافذ کرنے والے اداروں اور مادر وطن کے دفاع میں جانوں کا نذرانہ پیش کرنے والے شہداء اور معصوم شہریوں کے لیے فاتحہ خوانی کی گئی۔ فورم نے شہداء کی بے مثال قربانیوں کو خراج عقیدت پیش کرتے ہوئے کہا کہ ان کی لازوال قربانیاں پاکستان کی سلامتی کی بنیاد ہیں۔

فیلڈ مارشل عاصم منیر نے پاکستان کی مسلح افواج کی پیشہ ورانہ مہارت، آپریشنل تیاری اور انٹیلی جنس بنیادوں پر دہشت گردی کے خلاف جاری کارروائیوں کو سراہا۔ انہوں نے کہا کہ حکومت، مسلح افواج اور عوام کے باہمی تعاون سے پاکستان اپنی سیکیورٹی کامیابیوں کو مزید مستحکم اور معاشی استحکام کو مضبوط بنا رہا ہے جبکہ علاقائی و عالمی سطح پر اپنی حیثیت بہتر بنانے کی جانب گامزن ہے۔

فورم نے اس عزم کا اعادہ کیا کہ بھارت اور دیگر بیرونی سرپرستوں کی حمایت یافتہ دہشت گرد عناصر، ان کے سہولت کاروں اور معاونین کے خلاف بلا امتیاز کارروائیاں جاری رہیں گی۔ کانفرنس میں کہا گیا کہ آپریشن غضب لِلحق کی رفتار برقرار رکھی جائے گی جب تک دہشت گردوں کی محفوظ پناہ گاہوں کا مکمل خاتمہ نہ ہو جائے اور افغان سرزمین کے پاکستان کے خلاف استعمال کو ختم نہ کر دیا جائے۔

فورم نے بھارت کی جانب سے گمراہ کن معلومات، بے بنیاد الزامات اور فالس فلیگ آپریشنز کے بیانیے کو مسترد کرتے ہوئے کہا کہ ایسے ہتھکنڈے عالمی سطح پر بے نقاب ہو چکے ہیں۔ کانفرنس میں مقبوضہ جموں و کشمیر میں انسانی حقوق کی خلاف ورزیوں، ماورائے عدالت ہلاکتوں اور جعلی مقابلوں پر بھی تشویش کا اظہار کیا گیا۔

کانفرنس کے اختتام پر آرمی چیف نے کمانڈرز کو آپریشنل تیاری، نظم و ضبط، تربیت اور جدید جنگی مہارتوں کو برقرار رکھنے کی ہدایت کی اور مسلح افواج کی ہر قسم کے خطرات سے نمٹنے کی صلاحیت پر مکمل اعتماد کا اظہار کیا۔