آبنائے ہرمز میں کشیدگی میں اضافہ، ایران کی امریکا کو سخت وارننگ، ٹرمپ کے “پروجیکٹ فریڈم” پر تنازع

( تہران/واشنگٹن ) آبنائے ہرمز میں صورتحال ایک بار پھر کشیدہ ہو گئی ہے، جہاں ایران نے امریکی اقدامات پر سخت ردعمل دیتے ہوئے خبردار کیا ہے کہ کسی بھی امریکی فوجی موجودگی کو “نشانہ بنایا جائے گا”۔ یہ بیان اس وقت سامنے آیا جب امریکی صدر ڈونلڈ ٹرمپ نے اعلان کیا کہ امریکا “پروجیکٹ فریڈم” کے تحت جہازوں کو آبنائے ہرمز سے محفوظ راستہ فراہم کرے گا۔

ایرانی پارلیمنٹ کی قومی سلامتی و خارجہ پالیسی کمیٹی کے سربراہ ابراہیم عزیزی نے کہا کہ آبنائے ہرمز میں امریکی مداخلت کو جنگ بندی کی خلاف ورزی تصور کیا جائے گا۔ انہوں نے سوشل میڈیا پر اپنے بیان میں کہا کہ “آبنائے ہرمز اور خلیج فارس کو ٹرمپ کے بیانات کے ذریعے نہیں چلایا جا سکتا” اور یہ کہ یہ علاقہ محض بیان بازی کے لیے نہیں ہے۔

ایرانی حکام کے مطابق پیر کے روز ایک امریکی بحری جہاز کو آبنائے ہرمز میں داخل ہونے سے روکنے کے لیے “وارننگ شاٹ” فائر کیا گیا۔ ایک سینئر ایرانی عہدیدار نے دعویٰ کیا کہ یہ اقدام امریکی جہاز کو آگے بڑھنے سے روکنے کے لیے کیا گیا، تاہم کسی نقصان کی تصدیق نہیں ہو سکی۔

دوسری جانب امریکی سینٹرل کمانڈ نے ایرانی دعوؤں کو مسترد کرتے ہوئے کہا ہے کہ کسی امریکی جہاز پر میزائل حملہ نہیں ہوا۔ ترجمان کیپٹن ٹم ہاکنز کے مطابق ایران کے یہ دعوے “جھوٹ اور پروپیگنڈا” ہیں۔

ایرانی نیم سرکاری خبر رساں ادارے فارز نیوز ایجنسی نے اس سے قبل دعویٰ کیا تھا کہ ایران نے جاسک بندرگاہ کے قریب ایک امریکی جہاز کو دو میزائلوں سے نشانہ بنایا ہے، تاہم امریکی حکام نے اس خبر کو مکمل طور پر غلط قرار دیا ہے۔