آبنائے ہرمز کے قریب نہ آئیں، ایرانی افواج کی امریکی بحریہ کو سخت وارننگ

ایرانی افواج کے ترجمان کے مطابق آبنائے ہرمز کی سلامتی کا مکمل کنٹرول ایران کے پاس ہے اور اب تمام تجارتی بحری جہازوں اور آئل ٹینکرز کو اس علاقے میں داخل ہونے سے قبل ایرانی حکام سے قریبی رابطہ رکھنا ہوگا۔ انہوں نے کہا کہ نیوی گیشن کا عمل ایرانی مسلح افواج کی نگرانی میں انجام دیا جائے گا۔

ترجمان نے واضح کیا کہ ایران کی سرحدوں یا کسی بھی حساس مقام پر خطرے کی صورت میں فوری اور سخت ردعمل دیا جائے گا۔ ان کا کہنا تھا کہ خلیجی پانیوں میں کسی بھی قسم کی غیر معمولی سرگرمی کو برداشت نہیں کیا جائے گا۔

ایرانی حکام نے امریکی بحریہ کو خبردار کرتے ہوئے کہا کہ وہ آبنائے ہرمز کے قریب بھی نہ آئے کیونکہ امریکا کے جارحانہ اقدامات خطے کی موجودہ صورتحال کو مزید پیچیدہ بنا سکتے ہیں۔

انہوں نے مزید کہا کہ خلیج میں بحری جہازوں کی سلامتی کے لیے امریکی مداخلت خود ایک خطرہ بن چکی ہے، اس لیے تمام بحری جہازوں کو اپنی حفاظت کے لیے ایرانی ہدایات پر عمل کرنا ہوگا۔

ماہرین کے مطابق آبنائے ہرمز میں بڑھتی ہوئی کشیدگی عالمی تجارتی راستوں اور تیل کی ترسیل پر گہرے اثرات مرتب کر سکتی ہے۔