امریکی جہازوں پر حملہ ہوا تو ایران کو صفحۂ ہستی سے مٹا دیں گے: ٹرمپ کی دھمکی

واشنگٹن میڈیا سے گفتگو کرتے ہوئے ٹرمپ نے کہا کہ اگر ایران نے "پروجیکٹ فریڈم" کے تحت کام کرنے والے امریکی بحری جہازوں پر حملہ کیا تو امریکا بھرپور اور فیصلہ کن ردعمل دے گا۔ انہوں نے دعویٰ کیا کہ امریکا کے پاس پہلے سے کہیں زیادہ جدید اسلحہ اور گولہ بارود موجود ہے۔

صدر ڈونلڈ ٹرمپ کا کہنا تھا کہ خطے میں امریکی فوجی تیاریوں میں مسلسل اضافہ کیا جا رہا ہے اور دنیا بھر میں قائم امریکی اڈے مکمل طور پر ساز و سامان سے لیس ہیں۔ انہوں نے کہا کہ ضرورت پڑنے پر امریکا اپنی عسکری طاقت استعمال کرنے سے گریز نہیں کرے گا۔

تاہم امریکی صدر نے یہ بھی کہا کہ ان کے خیال میں ایران امن مذاکرات میں کسی حد تک لچک دکھا رہا ہے، جو صورتحال میں بہتری کی ایک ممکنہ علامت ہو سکتی ہے۔

دفاعی تجزیہ کاروں کے مطابق اس طرح کے بیانات خطے میں کشیدگی کو مزید بڑھا سکتے ہیں، جبکہ عالمی برادری ممکنہ تصادم سے بچنے کے لیے سفارتی کوششوں پر زور دے رہی ہے۔