ایران سے جنگ بندی صرف 3 سے 5 روز کیلئے، غیر معینہ توسیع نہیں: امریکی میڈیا

(واشنگٹن) امریکی میڈیا نے دعویٰ کیا ہے کہ ایران کے ساتھ جنگ بندی غیر معینہ مدت کیلئے نہیں بلکہ محدود وقت، یعنی 3 سے 5 روز کیلئے کی گئی ہے۔

امریکی نشریاتی ادارےسی این این کی رپورٹ کے مطابق وائٹ ہاؤس ذرائع کا کہنا ہے کہ امریکی صدر ڈونلڈ ٹرمپ ایران کے ساتھ معاہدہ جلد از جلد حتمی شکل دینا چاہتے ہیں اور اسی مقصد کے تحت ایران کو تجاویز پیش کرنے کیلئے محدود وقت دیا گیا ہے۔

رپورٹ میں کہا گیا ہے کہ امریکی صدر کا خیال ہے کہ ڈیڈ لائن کا دباؤ ایران کو مذاکرات کی میز پر لانے میں مؤثر ثابت ہوگا اور تاخیر کی گنجائش کم ہو جائے گی۔

امریکی میڈیا کے مطابق ٹرمپ انتظامیہ جنگ بندی کو غیر معینہ مدت تک بڑھانے کے حق میں نہیں اور ایران کو مزید وقت دینے سے گریز کیا جا رہا ہے تاکہ سفارتی عمل تیز کیا جا سکے۔

رپورٹ میں مزید کہا گیا ہے کہ امریکا کی جانب سے جنگ بندی میں محدود توسیع دراصل معاملے کو سفارتی سطح پر حل کرنے کی کوشش کا حصہ ہے، جبکہ آبنائے ہرمز میں ناکہ بندی برقرار رکھ کر ایران پر دباؤ برقرار رکھنے کی حکمت عملی اپنائی گئی ہے۔

تجزیہ کاروں کے مطابق آئندہ چند روز اس معاملے میں انتہائی اہم ثابت ہو سکتے ہیں، جہاں مذاکرات کی کامیابی یا ناکامی خطے کی صورتحال کا رخ متعین کرے گی۔