خیبر میں سکیورٹی فورسز کا آپریشن، 22 دہشتگرد ہلاک

خیبر کے علاقے میں سکیورٹی فورسز نے ایک کامیاب کارروائی کرتے ہوئے 22 دہشتگردوں کو ہلاک کر دیا ہے۔آئی ایس پی آر کے مطابق یہ آپریشن خفیہ اطلاعات کی بنیاد پر کیا گیا۔

آئی ایس پی آر کے مطابق علاقے میں دہشتگردوں کی موجودگی کی اطلاع پر مشترکہ انٹیلی جنس بیسڈ آپریشن کیا گیا، جس کے نتیجے میں کالعدم تنظیم سے تعلق رکھنے والے 22 دہشتگرد مارے گئے۔ حکام کا کہنا ہے کہ ہلاک ہونے والے افراد علاقے میں دہشتگردی کی مختلف سرگرمیوں میں ملوث تھے۔

بیان میں مزید کہا گیا کہ کارروائی کے دوران دہشتگردوں نے گرفتاری سے بچنے کے لیے اندھا دھند فائرنگ کی، جس کے نتیجے میں ایک 10 سالہ معصوم بچہ جاں بحق ہو گیا، جس پر سکیورٹی اداروں نے افسوس کا اظہار کیا ہے۔

سکیورٹی فورسز نے ہلاک دہشتگردوں کے قبضے سے اسلحہ اور گولہ بارود بھی برآمد کر لیا ہے۔ علاقے میں مزید کلیئرنس آپریشن جاری ہے تاکہ ممکنہ خطرات کو مکمل طور پر ختم کیا جا سکے۔