پیٹرول 137 روپے اور ڈیزل 184 روپے فی لیٹر مہنگا ہوگیا

اسلام آباد: حکومت نے پیٹرولیم مصنوعات کی قیمتوں میں بڑا اضافہ کرتے ہوئے پیٹرول اور ڈیزل مہنگا کرنے کا اعلان کر دیا ہے۔ وزیر پیٹرولیم علی پرویز ملک اور وزیر خزانہ محمد اورنگزیب نے مشترکہ پریس کانفرنس میں نئی قیمتوں کا اعلان کیا۔

اعلان کے مطابق پیٹرول کی قیمت میں 137 روپے 23 پیسے فی لیٹر اضافہ کیا گیا ہے جس کے بعد پیٹرول کی نئی قیمت 458 روپے 40 پیسے فی لیٹر مقرر کر دی گئی ہے۔ اسی طرح ڈیزل کی قیمت میں 184 روپے 49 پیسے فی لیٹر اضافہ کیا گیا ہے، جس کے بعد ڈیزل کی نئی قیمت 520 روپے 35 پیسے فی لیٹر ہو گئی ہے۔ نئی قیمتوں کا اطلاق کل سے ہوگا جبکہ اس حوالے سے باقاعدہ نوٹیفکیشن بھی جاری کر دیا گیا ہے۔

وزیر خزانہ محمد اورنگزیب نے کہا کہ قیمتوں میں اضافے کا فیصلہ ملکی قیادت کی مشاورت سے کیا گیا ہے۔ انہوں نے بتایا کہ حکومت نے ٹارگٹڈ سبسڈی دینے کا فیصلہ کیا ہے تاکہ حقیقی مستحقین کو ریلیف فراہم کیا جا سکے۔

وزیر خزانہ کے مطابق موٹر سائیکل صارفین کو ہر ماہ 20 لیٹر پیٹرول پر 100 روپے فی لیٹر سبسڈی دی جائے گی جبکہ انٹرسٹی پبلک ٹرانسپورٹ کو ڈیزل پر فی لیٹر 100 روپے سبسڈی دی جائے گی۔ اس کے علاوہ ٹرک اور گڈز ٹرانسپورٹ کو 70 ہزار روپے ماہانہ سبسڈی دینے کا فیصلہ بھی کیا گیا ہے جبکہ ریلوے کو بھی سبسڈی فراہم کی جائے گی تاکہ کرایوں کو قابو میں رکھا جا سکے۔

وزیر پیٹرولیم علی پرویز ملک نے کہا کہ عالمی منڈی میں خام تیل کی قیمتوں میں ریکارڈ اضافہ ہوا ہے اور ڈیزل کی قیمت 250 ڈالر فی بیرل سے تجاوز کر چکی ہے۔ انہوں نے کہا کہ خطے کی صورتحال اور آبنائے ہرمز میں کشیدگی کے باعث توانائی بحران پیدا ہوا ہے جس کے اثرات پوری دنیا پر پڑ رہے ہیں۔

انہوں نے مزید کہا کہ حکومت نے عوام پر بوجھ کم رکھنے کی بھرپور کوشش کی، تاہم موجودہ حالات میں بلینکٹ سبسڈی برقرار رکھنا ممکن نہیں رہا۔ انہوں نے کہا کہ حکومت نے مشکل حالات کے باوجود ایندھن کی فراہمی میں خلل نہیں آنے دیا اور کمزور طبقات کو تحفظ دینے کے لیے ٹارگٹڈ سبسڈی کا فیصلہ کیا گیا ہے۔