پاکستان کی سفارتی کامیابی پر بھارتی میڈیا بوکھلا گیا

(اسلام آباد )امریکہ اور ایران کے درمیان جنگ بندی اور امن مذاکرات میں پاکستان کے کلیدی کردار پر بھارتی میڈیا میں شدید ردعمل سامنے آیا ہے، جبکہ ایک سابق امریکی سفارتکار نے بھارتی چینل کے لائیو شو میں اینکر کو کھری کھری سنا دیں۔

سابق امریکی سفارتکار جیفری گنٹر نے ایک بھارتی نیوز چینل کے پروگرام میں گفتگو کرتے ہوئے کہا کہ امریکی نائب صدر جے ڈی وینس کی پاکستان میں سیکیورٹی پر اٹھائے گئے سوالات غیر سنجیدہ اور بے بنیاد ہیں۔

انہوں نے واضح الفاظ میں کہا کہ امریکی نائب صدر پاکستان میں مکمل طور پر محفوظ ہیں اور بھارتی میڈیا کا طرز عمل اسکول کے بچوں جیسا غیر سنجیدہ ہے۔ جیفری گنٹر نے مزید کہا کہ یہ انسانی زندگیوں، روزگار اور عالمی معیشت کا معاملہ ہے لیکن بھارتی میڈیا اسے محض پاک بھارت تنازع بنا کر پیش کر رہا ہے جو افسوسناک ہے۔

سابق امریکی سفارتکار نے بھارتی میڈیا کے رویے کو "شرمناک" قرار دیتے ہوئے کہا کہ اس قسم کے رویے پر بطور سزا اینکر کو 30 منٹ کیلئے کمرے میں بند کر دینا چاہیے تاکہ وہ سنجیدگی کا مظاہرہ سیکھ سکیں۔

دوسری جانب پاکستان کے کردار پر بھارتی میڈیا کی تنقید کو مبصرین نے نریندر مودی حکومت کیلئے سفارتی دباؤ قرار دیا ہے۔ ماہرین کے مطابق پاکستان کی ثالثی سے ہونے والی پیش رفت نے عالمی سطح پر پاکستان کے سفارتی مقام کو مضبوط کیا ہے۔

واضح رہے کہ امریکہ اور ایران کے درمیان جاری امن مذاکرات کیلئے دونوں ممالک کے وفود اسلام آباد میں موجود ہیں، جبکہ پاکستان خطے میں کشیدگی کم کرنے کیلئے اہم سفارتی کردار ادا کر رہا ہے۔