وزیراعظم شہباز شریف نے موٹرسائیکل سواروں اور پبلک ٹرانسپورٹ سبسڈی میں ایک ماہ کی توسیع کر دی

(اسلام آباد) شہباز شریف نے کمزور طبقے کو ریلیف فراہم کرنے کے تسلسل کو برقرار رکھتے ہوئے موٹرسائیکل سواروں، پبلک ٹرانسپورٹ اور گڈز ٹرانسپورٹ کیلئے سبسڈی میں ایک ماہ کی مزید توسیع کی منظوری دے دی ہے۔

وزیراعظم نے متعلقہ حکام کو ہدایت کی ہے کہ سفری کرایوں اور مال بردار گاڑیوں کے کرایوں میں اضافے کو روکا جائے اور عوامی ریلیف اقدامات کی مؤثر نگرانی یقینی بنائی جائے۔

شہباز شریف نے کہا کہ حکومت نے مشکل معاشی حالات میں عام آدمی کیلئے اربوں روپے کا قومی ریلیف پیکج فراہم کیا ہے اور آئندہ بھی جہاں تک ممکن ہوا عوام کو ریلیف دیا جاتا رہے گا۔

انہوں نے کہا کہ عام آدمی کو ریلیف فراہم کرنا حکومت کی اولین ترجیح ہے اور حکومت عوامی مشکلات کم کرنے کیلئے تمام ممکنہ اقدامات جاری رکھے گی۔

وزیراعظم نے امید ظاہر کی کہ خطے کی موجودہ صورتحال میں جلد بہتری آئے گی تاکہ معیشت اور عوامی زندگی پر مثبت اثرات مرتب ہوں۔