امریکہ نے پشاور قونصل خانہ بند کرنے کا اعلان کر دیا

( واشنگٹن / محمد نعیم اختر ) محکمہ خارجہ کے جاری کردہ بیان میں کہا گیا ہے کہ یہ اقدام سفارتی عملے کی حفاظت کو یقینی بنانے اور وسائل کے بہتر انتظام کے عزم کی عکاسی کرتا ہے۔ بیان میں مزید کہا گیا کہ پشاور میں امریکی موجودگی ختم ہونے کے باوجود خطے کے ساتھ سفارتی رابطے دیگر ذرائع سے جاری رہیں گے۔

یہ فیصلہ ایسے وقت میں سامنے آیا ہے جب پشاور اور خیبر پختونخوا میں سیکیورٹی صورتحال بدستور نازک ہے۔ حالیہ برسوں میں اس خطے میں شدت پسند کارروائیوں میں دوبارہ اضافہ دیکھا گیا ہے، جن میں سیکیورٹی فورسز، سرکاری تنصیبات اور شہری اہداف پر حملے شامل ہیں۔ پشاور، جو ماضی میں انسداد دہشت گردی آپریشنز کے بعد نسبتاً پرامن سمجھا جا رہا تھا، اب دوبارہ وقفے وقفے سے سیکیورٹی واقعات کا سامنا کر رہا ہے۔

امریکی محکمہ خارجہ کی جانب سے جاری ٹریول ایڈوائزری میں خیبر پختونخوا کو ہائی رسک قرار دیا گیا ہے اور امریکی شہریوں کو دہشت گردی اور سیکیورٹی خطرات کے باعث اس علاقے کا سفر مؤخر کرنے کی ہدایت کی گئی ہے۔ ایڈوائزری میں بارودی مواد (آئی ای ڈیز)، ٹارگٹ کلنگ اور انسداد دہشت گردی کارروائیوں کے خطرات کی نشاندہی کی گئی ہے، خاص طور پر افغانستان سے ملحقہ علاقوں میں۔

امریکی حکام کا کہنا ہے کہ قونصل خانے کی بندش کے باوجود پاکستان کے حوالے سے امریکی پالیسی میں کوئی تبدیلی نہیں آئی۔ امریکہ پاکستان کے ساتھ معاشی تعلقات کے فروغ، علاقائی استحکام اور باہمی تعاون کو جاری رکھے گا۔ سفارتی سرگرمیاں اب اسلام آباد، کراچی اور لاہور میں قائم امریکی مشنز کے ذریعے جاری رہیں گی۔

یہ اقدام صدر ڈونلڈ ٹرمپ کے ان بیانات کے تناظر میں بھی دیکھا جا رہا ہے جن میں انہوں نے عالمی سطح پر امریکی سفارتی مشنز کی تعداد کم کرنے پر زور دیا تھا۔ ان کا مؤقف تھا کہ غیر ضروری سفارت خانوں اور قونصل خانوں کو بند کر کے وسائل کو زیادہ اہم اور اسٹریٹجک مقامات پر مرکوز کیا جائے۔