عباس عراقچی اور وانگ یی کی بیجنگ میں ملاقات، خطے کی کشیدہ صورتحال پر اہم گفتگو

(بیجنگ)عباس عراقچی نے اپنے دورہ چین کے دوران چینی وزیر خارجہ وانگ یی سے اہم ملاقات کی، جس میں خطے کی تازہ صورتحال، عالمی پیش رفت اور دوطرفہ تعلقات پر تفصیلی تبادلہ خیال کیا گیا۔

خبر ایجنسی کے مطابق ملاقات میں دونوں رہنماؤں نے موجودہ کشیدگی اور اس کے ممکنہ اثرات پر غور کیا۔ چینی وزیر خارجہ وانگ یی نے ایران کے خلاف جاری جنگ کو غیر قانونی قرار دیتے ہوئے کہا کہ چین کشیدگی کم کرنے کے لیے ہر ممکن تعاون فراہم کرنے کے لیے تیار ہے۔

انہوں نے زور دیا کہ مکمل جنگ بندی ناگزیر ہے کیونکہ خطہ اس وقت ایک نازک مرحلے سے گزر رہا ہے۔ وانگ یی کے مطابق دونوں فریقین کے درمیان براہ راست مذاکرات ہی مسائل کے حل کا مؤثر ذریعہ ہو سکتے ہیں۔

اس موقع پر عباس عراقچی نے کہا کہ ایران صرف ایک منصفانہ اور جامع معاہدہ ہی قبول کرے گا۔ انہوں نے چین کے مضبوط مؤقف کو سراہتے ہوئے کہا کہ چین ایران کا قریبی دوست ہے اور موجودہ حالات میں دونوں ممالک کے درمیان تعاون مزید مضبوط ہوگا۔

ایرانی وزیر خارجہ نے جنگ کو کھلی جارحیت اور عالمی قوانین کی خلاف ورزی قرار دیتے ہوئے کہا کہ ایران مذاکرات کے دوران اپنے جائز حقوق اور مفادات کے تحفظ کے لیے بھرپور کوشش کرے گا۔

واضح رہے کہ عباس عراقچی چینی حکام کی دعوت پر چین کا دورہ کر رہے ہیں، جبکہ ان کا یہ دورہ صدر ٹرمپ کے متوقع دورہ چین سے ایک ہفتہ قبل ہو رہا ہے، جسے سفارتی سطح پر اہم پیش رفت قرار دیا جا رہا ہے۔