سپریم کورٹ کا تاریخی فیصلہ، 27 ویں ترمیم کے بعد وفاقی آئینی عدالت اور عدالت عظمیٰ کے دائرۂ اختیار کی وضاحت کر دی

(اسلام آباد) سپریم کورٹ آف پاکستان نے 27ویں آئینی ترمیم کے بعد ایک اہم اور تفصیلی فیصلہ جاری کرتے ہوئے وفاقی آئینی عدالت اور عدالت عظمیٰ کے دائرۂ اختیار کی واضح تشریح کر دی ہے۔

فیصلہ چیف جسٹس جسٹس یحییٰ آفریدی کی سربراہی میں دو رکنی بینچ نے جاری کیا، جس میں قرار دیا گیا کہ سپریم کورٹ اور وفاقی آئینی عدالت ایک دوسرے کے ماتحت نہیں بلکہ ہم پلہ عدالتیں ہیں۔ تاہم عدالت نے یہ بھی واضح کیا کہ وفاقی آئینی عدالت کے فیصلے قانونی اصولوں کے حوالے سے دیگر عدالتوں پر لازم ہوں گے۔

عدالت نے اپنے فیصلے میں کہا کہ آئین کا آرٹیکل 189 کسی ایک عدالت کو دوسری کے ماتحت نہیں بناتا۔ مزید کہا گیا کہ آئینی اور غیر آئینی مقدمات کو ایک ساتھ چلانے سے پیچیدگیاں پیدا ہو سکتی ہیں، اس لیے ایسے مقدمات کو الگ الگ فورمز پر بھیجا جائے گا۔

فیصلے کے مطابق آئینی نوعیت کے مقدمات وفاقی آئینی عدالت میں سنے جائیں گے جبکہ عام اور ریگولر نوعیت کے مقدمات سپریم کورٹ کے دائرہ اختیار میں رہیں گے۔ عدالت نے ہدایت دی کہ متضاد فیصلوں سے بچنے کے لیے دونوں عدالتیں ایک دوسرے کے دائرہ اختیار کا احترام کریں گی۔

مزید برآں، عدالت نے واضح کیا کہ آئین کے آرٹیکل 199 کے تحت دائر آئینی درخواستوں کی اپیلیں وفاقی آئینی عدالت میں سنی جائیں گی جبکہ عام سول اپیلوں کا اختیار بدستور سپریم کورٹ کے پاس رہے گا۔

فیصلے میں یہ بھی کہا گیا کہ ہائی کورٹ کے آئینی فیصلوں کے خلاف اپیلیں وفاقی آئینی عدالت کو منتقل تصور ہوں گی، جبکہ کرایہ داری اور بعض خاندانی معاملات اس کے دائرہ اختیار سے مستثنیٰ ہوں گے۔

عدالت نے پشاور ہائی کورٹ کے مشترکہ فیصلے سے متعلق مقدمات ڈی کلب کرنے کا حکم دیتے ہوئے ہدایت کی کہ سول نوعیت کی اپیلیں سپریم کورٹ میں ہی زیر سماعت رہیں گی جبکہ آئینی نوعیت کی اپیلیں وفاقی آئینی عدالت کو منتقل کی جائیں۔

اس کے علاوہ عدالت نے قرار دیا کہ توہین عدالت کے مقدمات وہی عدالت سنے گی جس کے احکامات کی خلاف ورزی ہوئی ہو، اور سپریم کورٹ کے احکامات کی خلاف ورزی سے متعلق کارروائی بھی سپریم کورٹ میں ہی چلائی جائے گی کیونکہ یہ اختیار عدالت کے وقار اور عملداری سے جڑا ہے۔