ٹرمپ کا ایران سے ممکنہ معاہدے پر نیا بیان، “ابھی کسی نے ہماری ڈیل نہیں دیکھی”

(واشنگٹن) امریکی صدر ڈونلڈ ٹرمپ نے ایران کے ساتھ ممکنہ معاہدے کے حوالے سے ایک اور اہم بیان جاری کرتے ہوئے کہا ہے کہ ابھی تک کسی نے ہماری ڈیل نہیں دیکھی اور نہ ہی کوئی اس کے بارے میں جانتا ہے۔

سوشل میڈیا پر جاری اپنے بیان میں صدر ٹرمپ نے کہا کہ ایران کے ساتھ معاہدہ ابھی مکمل طور پر طے بھی نہیں ہوا، تاہم بعض لوگ ایسی چیز پر تنقید کر رہے ہیں جس کے بارے میں انہیں مکمل معلومات حاصل نہیں ہیں۔

انہوں نے کہا کہ ایران کا مسئلہ ان سے پہلے آنے والے امریکی صدور کو حل کرنا چاہیے تھا، لیکن اگر وہ ایران کے ساتھ کوئی معاہدہ کرتے ہیں تو وہ ایک “مکمل اور اچھی ڈیل” ہوگی۔

صدر ٹرمپ نے سابق امریکی صدر اوباماکے دور میں ہونے والے ایران معاہدے کا حوالہ دیتے ہوئے کہا کہ ان کی ڈیل “اوباما ڈیل” جیسی نہیں ہوگی بلکہ اس سے مختلف اور زیادہ مضبوط ہوگی۔

دوسری جانب ایرانی میڈیا نے دعویٰ کیا ہے کہ امریکا بعض اہم نکات پر معاہدے کی راہ میں رکاوٹ بنا ہوا ہے۔ رپورٹس کے مطابق واشنگٹن ایران کے منجمد اثاثے جاری کرنے پر آمادہ نہیں، جس کے باعث مذاکرات میں پیچیدگیاں برقرار ہیں۔

ایرانی ذرائع کے مطابق اگر اختلافات برقرار رہے تو معاہدہ منسوخ ہونے کے امکانات بھی موجود ہیں، جس سے خطے میں جاری سفارتی سرگرمیوں پر غیر یقینی صورتحال کے سائے گہرے ہو سکتے ہیں۔