پاکستان نے مسئلہ فلسطین کو مشرق وسطیٰ میں عدم استحکام کی بنیادی وجہ قرار دے دیا

(نیویارک) پاکستان نے مشرقِ وسطیٰ میں جاری کشیدگی اور عدم استحکام کی بنیادی وجہ مسئلہ فلسطین کو قرار دیتے ہوئے اس کے فوری اور منصفانہ حل پر زور دیا ہے۔ اقوام متحدہ میں پاکستان کے مستقل مندوب عاصم افتخار نے اپنے بیان میں کہا کہ خطے میں پائیدار امن کے لیے فلسطین کا مسئلہ حل کرنا ناگزیر ہے۔

انہوں نے کہا کہ اسرائیل کے قبضے کا خاتمہ اور دو ریاستی حل ہی دیرپا امن کی واحد راہ ہے۔ ان کے مطابق، غزہ میں جنگ بندی کے باوجود اسرائیلی حملوں میں 800 سے زائد فلسطینی شہید ہو چکے ہیں، جو تشویشناک صورتحال کی عکاسی کرتا ہے۔

پاکستانی مندوب نے مطالبہ کیا کہ غزہ امن منصوبے کے دوسرے مرحلے کو فوری طور پر مکمل کیا جائے۔ انہوں نے مغربی کنارے میں آباد کاروں کے تشدد اور غیر قانونی بستیوں کی توسیع پر بھی گہری تشویش کا اظہار کیا، اور کہا کہ یہ اقدامات خطے میں کشیدگی کو مزید بڑھا رہے ہیں۔

مسجد اقصیٰ میں مبینہ دراندازیوں اور مقدس مقامات کی پامالی پر بھی انہوں نے فوری روک لگانے کا مطالبہ کیا۔ مزید برآں، لبنان میں اسرائیلی فوجی کارروائیوں کے نتیجے میں 2 ہزار سے زائد شہریوں کے ہلاک و زخمی ہونے کا حوالہ دیتے ہوئے انہوں نے اس صورتحال کو بھی انتہائی تشویشناک قرار دیا۔

پاکستانی مندوب نے کہا کہ شام کی خودمختاری، وحدت اور علاقائی سالمیت کے مکمل احترام پر زور دیتے ہوئے کہا کہ خطے میں امن کے لیے بین الاقوامی قوانین کی پاسداری ناگزیر ہے۔