اینٹی کرپشن اصلاحات تیز، افسران کے اثاثے دسمبر 2026 تک پبلک کرنے کا فیصلہ

(اسلاماآباد)دستاویز کے مطابق مالی جرائم کی تحقیقات کے لیے قانون نافذ کرنے والے اداروں کی استعداد کار بہتر بنانے کا فیصلہ کیا گیا ہے جبکہ سرکاری افسران کے اثاثے ڈیجیٹل طریقے سے جمع کرنے کا نظام بھی متعارف کرایا جائے گا۔ اس کے علاوہ بینکوں کو سرکاری افسران کے اثاثوں تک رسائی دینے کی تجویز بھی شامل ہے۔

حکومتی منصوبے کے تحت بیرون ملک لوٹی گئی دولت واپس لانے کے لیے عالمی معاہدوں میں بہتری لائی جائے گی، جبکہ منجمد، ریکور شدہ اور واپس لائے گئے اثاثوں کا ڈیجیٹل ڈیٹا بیس بھی تیار کیا جائے گا۔ ایسٹ ریکوری اور مینجمنٹ یونٹس کو مزید مضبوط بنانے کا فیصلہ بھی کیا گیا ہے۔

دستاویز میں کہا گیا ہے کہ ایف بی آر اثاثہ جات جمع کروانے کے لیے نیا ڈیجیٹل پلیٹ فارم بنائے گا، جبکہ کرپشن کے خطرات کم کرنے کے لیے 10 بڑے سرکاری محکموں کی نشاندہی کی جائے گی۔ مشکوک مالی لین دین کی رپورٹنگ کے معیار اور تعداد میں اضافے کا بھی فیصلہ کیا گیا ہے۔

حکومت نے آئی ایم ایف کو یقین دہانی کرائی ہے کہ اینٹی کرپشن اصلاحات کی پیش رفت پر ہر 6 ماہ بعد رپورٹ جاری کی جائے گی۔ اس کے علاوہ نیب کو مزید خودمختاری دینے، نیشنل رسک اسیسمنٹ کرنے اور اینٹی منی لانڈرنگ و کاؤنٹر ٹیرر فنانسنگ کے تحت ٹاسک فورس قائم کرنے کا فیصلہ کیا گیا ہے۔

اس ٹاسک فورس میں نیب، ایف آئی اے، ایف بی آر، آڈیٹر جنرل، ایس ای سی پی سمیت دیگر ادارے شامل ہوں گے تاکہ کرپشن کے خلاف مربوط حکمت عملی تیار کی جا سکے۔

حکومت نے نیب چیئرمین کی تعیناتی کا طریقہ کار بہتر بنانے کا بھی فیصلہ کیا ہے۔ آئی ایم ایف نے نیب چیئرمین کی تقرری کے لیے اپوزیشن کی نمائندگی سمیت کمیشن قائم کرنے پر زور دیا ہے۔ اس کے علاوہ نیب میں میرٹ، شفاف اور اوپن سلیکشن سسٹم متعارف کروانے اور کارکردگی رپورٹ عوام کے لیے جاری کرنے کا بھی فیصلہ کیا گیا ہے۔

حکومت کے مطابق منی لانڈرنگ سے متعلق تحقیقات اور سزاؤں کے طریقہ کار کو مزید مضبوط بنایا جائے گا جبکہ اینٹی کرپشن ایکشن پلان اکتوبر 2026 تک تیار کیا جائے گا۔