اسرائیل ایران جنگ دوبارہ شروع کرنے کو تیار، اہداف طے، شدید حملوں کی دھمکی

(تل ابیب) اسرائیل کاٹز نے کہا ہے کہ اسرائیل ایران کے خلاف جنگ دوبارہ شروع کرنے کیلئے مکمل طور پر تیار ہے اور اس حوالے سے اہداف پہلے ہی طے کیے جا چکے ہیں۔

امریکی خبر رساں ادارے سی این این کے مطابق اسرائیلی وزیر دفاع نے وزارتِ دفاع میں اعلیٰ سطحی اجلاس کے دوران کہا کہ فوجی کارروائی دوبارہ شروع کرنے کیلئے تمام تیاریاں مکمل ہیں۔

اسرائیل کاٹز کے مطابق اسرائیل اس وقت امریکا کی جانب سے اجازت کا منتظر ہے تاکہ ایران کے خلاف کارروائی کا دوبارہ آغاز کیا جا سکے۔

انہوں نے دعویٰ کیا کہ آئندہ حملے پہلے سے زیادہ شدید اور تباہ کن ہوں گے اور ایران کو مزید نقصان پہنچائیں گے۔ اسرائیلی وزیر دفاع نے خبردار کیا کہ کسی بھی ممکنہ کارروائی کی صورت میں ایران کے بنیادی ڈھانچے کو شدید نقصان پہنچایا جا سکتا ہے۔

اس بیان کے بعد خطے میں کشیدگی میں مزید اضافے کا خدشہ ظاہر کیا جا رہا ہے، جبکہ ماہرین کے مطابق ایسی پیش رفت مشرق وسطیٰ میں عدم استحکام کو بڑھا سکتی ہے۔