لبنان پر اسرائیلی حملے، 254 افراد شہید، لبنان میں یوم سوگ

(بیروت) لبنانی حکام کے مطابق حملوں کے بعد ملک بھر میں سرکاری دفاتر بند رکھے گئے ہیں جبکہ متاثرہ علاقوں میں امدادی کارروائیاں جاری ہیں۔ شہری بنیادی ڈھانچے کو بھی شدید نقصان پہنچا ہے جس سے صورتحال مزید سنگین ہو گئی ہے۔

اقوام متحدہ کے ہائی کمشنر برائے انسانی حقوق وولکر ترک نے ایران کے ساتھ جنگ بندی کے چند گھنٹوں بعد ہونے والی اس خونریزی کو ناقابل یقین قرار دیتے ہوئے شدید تشویش کا اظہار کیا ہے۔

دوسری جانب فرانسیسی صدر ایمانویل میکرون نے کہا ہے کہ جنگ بندی کو دیرپا بنانے کے لیے لبنان کو بھی شامل کرنا ضروری ہے۔ انہوں نے امریکی صدر ڈونلڈ ٹرمپ اور ایرانی صدر مسعود پزشکیان سے اپیل کی کہ جنگ بندی کو برقرار رکھنا خطے کے امن کے لیے اہم قدم ہوگا۔

تجزیہ کاروں کے مطابق لبنان میں اسرائیلی حملوں نے خطے میں کشیدگی کو مزید بڑھا دیا ہے اور جنگ بندی کے مستقبل پر بھی سوالات کھڑے ہو گئے ہیں۔