فیلڈ مارشل عاصم منیر اور چینی وزیر خارجہ کی ملاقات، پاک چین دوستی مزید مضبوط بنانے پر اتفاق

(اسلام آباد) فیلڈ مارشل سید عاصم منیر اور چینی وزیر خارجہ کے درمیان بیجنگ میں اہم ملاقات ہوئی، جس میں پاک چین دوطرفہ تعلقات، خطے کی مجموعی صورتحال اور اسٹریٹجک تعاون کے فروغ پر تفصیلی تبادلہ خیال کیا گیا۔

چینی وزارت خارجہ کے ترجمان کے مطابق رواں سال پاکستان اور چین کے درمیان سفارتی تعلقات کے قیام کی 75ویں سالگرہ منائی جا رہی ہے، جو دونوں ممالک کے دیرینہ، مضبوط اور مثالی تعلقات کی عکاس ہے۔

ترجمان نے کہا کہ چین اور پاکستان کی دوستی ہمیشہ چٹان کی طرح مضبوط رہی ہے اور عالمی حالات جیسے بھی ہوں، یہ تعلق ناقابل شکست رہے گا۔

ملاقات کے دوران دونوں ممالک نے اقتصادی، دفاعی اور اسٹریٹجک تعاون کو مزید وسعت دینے کے عزم کا اظہار کیا۔ چین نے پاک چین اقتصادی راہداری (سی پیک) سمیت دیگر مشترکہ منصوبوں کی مکمل حمایت جاری رکھنے کا اعادہ بھی کیا۔

چینی وزیر خارجہ نے پاک فوج کے کردار کو سراہتے ہوئے کہا کہ پاکستان نے ہمیشہ پاک چین تعاون کے فروغ میں کلیدی کردار ادا کیا ہے، جبکہ چین پاکستان کو خطے میں ایک قابل اعتماد اور اہم شراکت دار سمجھتا ہے۔

ترجمان نے فیلڈ مارشل سید عاصم منیر اور وزیراعظم شہباز شریف کے دورۂ چین کا خیر مقدم کرتے ہوئے امید ظاہر کی کہ ان اعلیٰ سطحی روابط سے دونوں ممالک کے تعلقات مزید مستحکم ہوں گے۔

سیاسی و سفارتی حلقے اس ملاقات کو پاک چین تعلقات کے فروغ کے حوالے سے اہم پیشرفت قرار دے رہے ہیں، جس سے خطے میں تعاون، اقتصادی روابط اور اسٹریٹجک شراکت داری کو نئی جہت ملنے کی توقع ہے۔