پٹرولیم قیمتوں میں ریکارڈ اضافے پر گڈز الائنس کا ردعمل، کرایوں میں 60 فیصد اضافے کا اعلان

(اسلام آباد) پاکستان گڈز ٹرانسپورٹ الائنس کے صدر ملک شہزاد نے حکومت کے فیصلے کی شدید مذمت کرتے ہوئے کہا کہ پٹرولیم مصنوعات کی قیمتوں میں بے تحاشہ اضافہ ملک میں مہنگائی کا نیا طوفان لائے گا۔ ان کا کہنا تھا کہ حکومتی پالیسیوں کے باعث ٹرانسپورٹ سیکٹر شدید دباؤ کا شکار ہے اور لاکھوں افراد کے روزگار کو خطرہ لاحق ہو چکا ہے۔

انہوں نے خبردار کیا کہ اگر پٹرولیم قیمتوں میں نظر ثانی نہ کی گئی تو ملک میں ٹرانسپورٹ کا نظام متاثر ہو سکتا ہے۔

دوسری جانب پاکستان پبلک ٹرانسپورٹ اونر ایسوسی ایشن نے بھی ڈیزل کی قیمت میں اضافے پر تشویش کا اظہار کرتے ہوئے ہنگامی اجلاس طلب کر لیا ہے۔ ایسوسی ایشن کا کہنا ہے کہ موجودہ حالات میں کرایوں میں اضافہ ناگزیر ہو چکا ہے اور حکومت کو ٹرانسپورٹرز کے مسائل کا فوری حل نکالنا ہوگا۔

واضح رہے کہ حکومت نے حالیہ اعلان میں پٹرول اور ڈیزل کی قیمتوں میں تاریخی اضافہ کیا ہے۔ علی پرویز ملک اور وزیر خزانہ نے مشترکہ پریس کانفرنس میں بتایا کہ پٹرول کی قیمت میں 137 روپے 24 پیسے فی لٹر اضافہ کیا گیا ہے، جس کے بعد نئی قیمت 458 روپے 40 پیسے فی لٹر ہو گئی ہے، جبکہ ڈیزل کی قیمت میں بھی 184 روپے 49 پیسے فی لٹر اضافہ کیا گیا ہے۔

ماہرین کے مطابق ٹرانسپورٹ کرایوں میں اس بڑے اضافے سے اشیائے ضروریہ کی قیمتوں میں مزید اضافہ متوقع ہے، جس کا براہ راست اثر عام شہری پر پڑے گا۔