امریکا ایران جنگ بندی میں پاکستان کا کردار قابلِ احترام ہے ، ششی تھرور

(نئی دہلی)اپنے بیان میں ششی تھرور نے کہا کہ مشرقِ وسطیٰ کے جاری بحران میں پاکستان کا ایک اہم ثالث کے طور پر سامنے آنا انڈیا کے لیے سنجیدہ اور مثبت ردعمل کا متقاضی ہے۔ انہوں نے زور دیا کہ بھارت کو امن کی کوششوں کی حمایت کرنی چاہیے، چاہے مذاکرات میں سہولت کاری کوئی بھی کر رہا ہو۔

انہوں نے مزید کہا کہ پاکستان کی عسکری قیادت اور ڈونلڈٹرمپ کے درمیان رابطے ایک عملی حقیقت ہیں جو روایتی سفارتی طریقہ کار سے ہٹ کر کام کر رہے ہیں۔

ششی تھرور کا کہنا تھا کہ اگر پاکستان اس عمل میں کامیاب ہوتا ہے تو بھارت کو سب سے پہلے اس کا خیر مقدم کرنا چاہیے کیونکہ ایٹمی صلاحیت کے حامل خطے میں استحکام سب کے مفاد میں ہے۔ انہوں نے بھارتی پالیسی سازوں کو خبردار کیا کہ وہ اس پیش رفت پر اسٹریٹجک بے چینی یا تنقید سے گریز کریں کیونکہ کسی بھی ناکام ثالثی کا اثر پورے خطے پر پڑ سکتا ہے۔

انہوں نے کہا کہ ایران اور پاکستان کے درمیان تقریباً 900 کلومیٹر طویل سرحد ہے، اس لیے کسی بھی علاقائی کشیدگی کے اثرات پاکستان پر براہِ راست پڑ سکتے ہیں۔ اس تناظر میں پاکستان کی ثالثی کوششیں فطری اور قابلِ فہم ہیں۔

ششی تھرور نے مزید کہا کہ جنگل کا قانون کسی کے مفاد میں نہیں ہوتا کیونکہ اس سے تمام ممالک طاقتور قوتوں کے رحم و کرم پر آ سکتے ہیں، اس لیے امن کی کوششوں کی حمایت ضروری ہے۔