فیلڈ مارشل عاصم منیر کی وزیراعظم سے اہم ملاقات، امن کیلئے ثالثی کردار جاری رکھنے کا عزم

(اسلام آباد)تفصیلات کے مطابق ملاقات میں دونوں رہنماؤں نے حالیہ کشیدگی میں کمی پر اطمینان کا اظہار کیا اور جنگ بندی برقرار رکھنے کی ضرورت پر زور دیا۔ اس موقع پر فریقین کے صبر و تحمل کو سراہتے ہوئے پرامن مذاکراتی حل کے لیے بھرپور حمایت کا اعادہ کیا گیا۔

ملاقات کے دوران وزیراعظم شہباز شریف نے امن عمل میں شامل تمام فریقین کے عزم کی تعریف کی اور خطے میں پائیدار امن کے قیام کے لیے نیک خواہشات کا اظہار کیا۔ انہوں نے آنے والے سفارتی وفود کو پاکستان آنے کی دعوت کا اعادہ بھی کیا۔

وزیراعظم نے وفود کو ہر ممکن سہولت اور مکمل تعاون کی یقین دہانی کراتے ہوئے کہا کہ پاکستان خطے میں امن و استحکام کے لیے اپنا مثبت کردار جاری رکھے گا۔

ملاقات میں اس عزم کا اعادہ کیا گیا کہ پاکستان کشیدگی کم کرنے اور مذاکرات کے ذریعے مسائل کے حل کے لیے اپنی سفارتی کوششیں جاری رکھے گا۔