پاکستان کا اقوامِ متحدہ کے امن دستوں کے تحفظ اور مؤثر اختیارات پر زور

( اقوامِ متحدہ، نیو یارک )سلامتی کونسل میں امن آپریشنز پر بریفنگ کے دوران اقوامِ متحدہ میں پاکستان کے مستقل مندوب، سفیر عاصم افتخار احمد نے کہا کہ فوجی قیادت سے براہِ راست آگاہی اہم ہے کیونکہ امن مشنز میں فوجی جزو بنیادی حیثیت رکھتا ہے۔ انہوں نے کہا کہ امن دستے اب زیادہ پیچیدہ حالات میں کام کر رہے ہیں جہاں ڈرونز سمیت نئے خطرات درپیش ہیں۔

پاکستان کے کردار کو اجاگر کرتے ہوئے انہوں نے کہا کہ ملک گزشتہ چھ دہائیوں سے زائد عرصے سے اقوامِ متحدہ کے بڑے فوجی دستے فراہم کرنے والوں میں شامل ہے، اور اب تک ڈھائی لاکھ سے زائد پاکستانی اہلکار 48 مشنز میں خدمات انجام دے چکے ہیں۔ انہوں نے بتایا کہ 182 پاکستانی امن اہلکار اپنی جانوں کا نذرانہ پیش کر چکے ہیں۔

سفیر عاصم نے حالیہ حملوں کے واقعات میں امن دستوں کو نشانہ بنانے کے واقعات کو تشویشناک قرار دیتے ہوئے کہا کہ ایسے حملے ناقابلِ قبول ہیں اور ان پر مکمل احتساب ضروری ہے تاکہ استثنیٰ کا خاتمہ ہو اور امن مشنز کی ساکھ برقرار رہے۔

انہوں نے زور دیا کہ اقوامِ متحدہ کے امن مشنز آج بھی عالمی امن کے قیام کے لیے ناگزیر اور لاگت کے لحاظ سے مؤثر ذریعہ ہیں، اور ان کی بہتری کے لیے مسلسل توجہ اور تعاون ضروری ہے۔