ایران امریکا معاہدے کی امید، عالمی منڈی میں تیل کی قیمتیں 5 فیصد سے زائد گر گئیں

ایران اور امریکا کے درمیان ممکنہ معاہدے کی امیدوں نے عالمی تیل مارکیٹ پر فوری اثر ڈال دیا، جس کے نتیجے میں خام تیل کی قیمتوں میں نمایاں کمی ریکارڈ کی گئی۔

خبر رساں اداروں کے مطابق ایشیائی منڈیوں میں پیر کے روز ابتدائی کاروبار کے دوران تیل کی قیمتیں 5 فیصد سے زائد گر گئیں۔ ماہرین کے مطابق سرمایہ کاروں نے مشرق وسطیٰ میں کشیدگی کم ہونے اور ممکنہ سفارتی پیش رفت کو مثبت اشارہ قرار دیا ہے۔

برینٹ خام تیل کی قیمت 5.1 فیصد کمی کے بعد 98.22 ڈالر فی بیرل تک آ گئی جبکہ ڈبلیو ٹی آئی خام تیل 5.2 فیصد کمی کے بعد 91.57 ڈالر فی بیرل پر فروخت ہوا۔

تجزیہ کاروں کا کہنا ہے کہ ایران اور امریکا کے درمیان مذاکرات میں پیش رفت اور خطے میں جنگ بندی یا کشیدگی میں کمی کے امکانات نے عالمی منڈی میں سپلائی کے خدشات کم کر دیے ہیں، جس کے باعث قیمتوں میں دباؤ دیکھنے میں آیا۔

دوسری جانب صدر ٹرمپ نے ممکنہ معاہدے کے حوالے سے محتاط رویہ اختیار کیا ہے۔ اتوار کو سوشل میڈیا پر جاری اپنے بیان میں انہوں نے کہا کہ انہوں نے اپنے نمائندوں کو ہدایت کی ہے کہ معاہدے میں جلد بازی نہ کی جائے۔

ماہرین کے مطابق اگر ایران اور امریکا کے درمیان باضابطہ معاہدہ طے پا جاتا ہے تو عالمی منڈی میں ایرانی تیل کی فراہمی بڑھ سکتی ہے، جس سے مستقبل میں بھی تیل کی قیمتوں میں مزید کمی کا امکان پیدا ہو سکتا ہے۔