فیلڈ مارشل عاصم منیر کی تہران میں ایرانی سپیکر باقر قالیباف سے ملاقات

(تہران) عاصم منیر نے تہران میں ایرانی پارلیمنٹ کے سپیکر محمد باقر قالیباف سے اہم ملاقات کی ہے، جس میں باہمی دلچسپی کے امور اور خطے کی مجموعی صورتحال پر تبادلہ خیال کیا گیا۔

ایرانی ذرائع ابلاغ کے مطابق یہ ملاقات تہران میں ہوئی جہاں دونوں رہنماؤں نے مختلف دوطرفہ اور علاقائی معاملات پر گفتگو کی۔

اس سے قبل فیلڈ مارشل سید عاصم منیر نے ایرانی وزیر خارجہ عباس عراقچی سے بھی ملاقات کی تھی، جس میں خطے میں امن و استحکام اور جاری سفارتی کوششوں پر بات چیت کی گئی۔

عباس عراقچی نے پاکستان کی جانب سے مذاکرات کی میزبانی پر شکریہ ادا کرتے ہوئے کہا تھا کہ خطے میں امن اور استحکام کے فروغ کے لیے دونوں ممالک کا عزم مضبوط اور مشترک ہے، جو گہرے دوطرفہ تعلقات کی عکاسی کرتا ہے۔

آئی ایس پی آر کے مطابق یہ دورہ تہران میں امریکا اور ایران کے درمیان جاری ثالثی کوششوں کا حصہ ہے۔ اس موقع پر پاکستانی وزیر داخلہ محسن نقوی بھی فیلڈ مارشل کے ہمراہ موجود تھے۔