لبنان میں فوجی سرگرمیاں امن کی کوششوں کے لیے سنگین خطرہ، اقوام متحدہ کی وارننگ

(نیویارک)اقوام متحدہ کی جانب سے جاری بیان کے مطابق سیکریٹری جنرل نے 8 اپریل کو اسرائیل کی جانب سے لبنان بھر میں کیے گئے بڑے پیمانے پر حملوں کی مذمت کی اور تمام فریقین سے فوری طور پر کارروائیاں بند کرنے کی اپیل کی۔

بیان میں کہا گیا کہ حملوں کے نتیجے میں سینکڑوں شہری، جن میں بچے بھی شامل ہیں، ہلاک اور زخمی ہوئے جبکہ شہری بنیادی ڈھانچے کو بھی شدید نقصان پہنچا ہے۔ سیکریٹری جنرل نے شہریوں کی بڑھتی ہوئی ہلاکتوں پر گہری تشویش ظاہر کی۔

انتونیو گوتریس نے زور دیا کہ لبنان میں جاری فوجی سرگرمیاں جنگ بندی اور خطے میں پائیدار اور جامع امن کی کوششوں کو نقصان پہنچا سکتی ہیں۔ انہوں نے کہا کہ اس تنازع کا کوئی فوجی حل ممکن نہیں اور تمام فریقین کو سفارتی راستہ اختیار کرنا ہوگا۔

سیکریٹری جنرل نے عالمی برادری سے بھی اپیل کی کہ کشیدگی کم کرنے کے لیے فوری اقدامات کیے جائیں تاکہ مزید انسانی نقصان سے بچا جا سکے۔