پاکستان کی حمایت سے جنوبی سوڈان میں اقوام متحدہ کے امن مشن میں ایک سال کی توسیع

(نیویارک) اقوام متحدہ کی سلامتی کونسل نے جنوبی سوڈان میں تعینات امن مشن کی مدت میں ایک سال کی توسیع کرتے ہوئے اسے 30 اپریل 2027ء تک جاری رکھنے کا فیصلہ کر دیا۔

عالمی میڈیا رپورٹس کے مطابق 15 میں سے 13 ارکان نے قرارداد کے حق میں ووٹ دیا، جن میں پاکستان بھی شامل تھا، جبکہ چین اور روس نے ووٹنگ میں حصہ نہیں لیا۔

رپورٹ میں بتایا گیا ہے کہ جنوبی سوڈان 2011ء میں آزادی کے بعد سے مسلسل سیاسی عدم استحکام، تنازعات اور انسانی بحران کا شکار ہے، جس کے باعث عالمی برادری نے امن مشن کے تسلسل کو ناگزیر قرار دیا۔

اقوام متحدہ میں پاکستان کے نائب مستقل مندوب عثمان جدون نے کہا کہ پاکستان نے امن مشن کی حمایت کرتے ہوئے قرارداد کے حق میں ووٹ دیا، تاہم بعض مجوزہ تبدیلیوں پر تحفظات بھی ظاہر کیے۔

عثمان جدون کے مطابق موجودہ زمینی صورتحال کے پیش نظر فوجیوں کی تعداد میں کمی مناسب نہیں ہوگی کیونکہ اس سے شہریوں کے تحفظ اور امن مشن کی مؤثریت متاثر ہو سکتی ہے۔

قرارداد کے مطابق مشن کا بنیادی مقصد شہریوں کا تحفظ، انسانی امداد کی فراہمی، امن معاہدے پر عملدرآمد میں معاونت اور انسانی حقوق کی نگرانی ہے، جبکہ سلامتی کونسل نے زور دیا ہے کہ ان ترجیحات کو ہر صورت برقرار رکھا جائے۔