چارسدہ میں معروف عالم دین مولانا ادریس فائرنگ سے جاں بحق، دو پولیس اہلکار زخمی

(چارسدہ) خیبر پختونخوا کے ضلع چارسدہ میں نامعلوم مسلح افراد کی فائرنگ سے معروف عالم دین اور سابق ایم پی اے مولانا ادریس جاں بحق ہو گئے، جبکہ دو پولیس اہلکار زخمی ہو گئے۔

پولیس کے مطابق فائرنگ کے نتیجے میں زخمی ہونے والے اہلکاروں کو فوری طور پر ڈسٹرکٹ ہیڈ کوارٹر اسپتال چارسدہ منتقل کر دیا گیا، جہاں انہیں طبی امداد فراہم کی جا رہی ہے۔

واقعے کے بعد حملہ آور موقع سے فرار ہونے میں کامیاب ہو گئے، جبکہ سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے تاکہ ملزمان کو جلد از جلد گرفتار کیا جا سکے۔

دوسری جانب واقعے کے خلاف طلبہ نے احتجاج کرتے ہوئے شدید غم و غصے کا اظہار کیا اور مطالبہ کیا کہ واقعے میں ملوث افراد کو فوری طور پر گرفتار کر کے شفاف تحقیقات کی جائیں۔

حکام کے مطابق علاقے میں سکیورٹی مزید سخت کر دی گئی ہے اور مختلف پہلوؤں سے تحقیقات جاری ہیں۔