ایرانی سپریم لیڈر: اسرائیل پر ایران کا مؤقف برقرار، دشمن جنگ میں شکست کھا چکا ہے

(تہران) ایرانی سپریم لیڈر مجتبیٰ خامنہ نے واضح کیا ہے کہ اسرائیل کے حوالے سے ایران کے مؤقف میں کوئی تبدیلی نہیں آئے گی اور ملک اپنے اصولی موقف پر قائم رہے گا۔

اپنے ایک تحریری پیغام میں ایرانی سپریم لیڈر نے کہا کہ دشمن میدانِ جنگ میں ایران سے شکست کھا چکا ہے اور اب وہ ایرانی عوام کو نقصان پہنچانے اور معاشرے میں اندرونی تقسیم پیدا کرنے کی کوشش کر رہا ہے۔ ان کا کہنا تھا کہ مخالف قوتیں مختلف حربوں کے ذریعے عوام میں مایوسی اور ناامیدی پھیلانا چاہتی ہیں تاکہ ایران کے قومی عزم کو کمزور کیا جا سکے۔

مجتبیٰ خامنہ نے کہا کہ عوام میں ناامیدی پیدا کرنے والا ہر عمل دشمن کی مدد کے مترادف ہے، تاہم ایرانی قوم کو ہوشیار رہنا ہوگا اور دشمن کے عزائم کو ناکام بنانا ہوگا۔ انہوں نے اس عزم کا اظہار کیا کہ طاقتور ممالک ایران کی ترقی اور پیش رفت کا راستہ نہیں روک سکتے۔

ایرانی سپریم لیڈر کے مطابق دشمن کو میدانِ جنگ میں ناکامی کے بعد اپنے مقاصد کے حصول میں شدید مشکلات کا سامنا ہے، اسی لیے اب ہائبرڈ جنگ اور نفسیاتی دباؤ کے ذریعے ایرانی عوام کے حوصلے پست کرنے کی کوشش کی جا رہی ہے۔

انہوں نے دعویٰ کیا کہ ایران سی آئی اے کی مختلف سازشوں کو ناکام بنانے میں کامیاب رہا ہے اور دشمن اپنی ناکامیوں کے بعد نئے طریقوں سے دباؤ بڑھانے کی کوشش کر رہا ہے۔

مجتبیٰ خامنہ نے اپنے پیغام میں مزید کہا کہ اسرائیل کے بارے میں ایران کا موقف تبدیل نہیں ہوگا۔ ان کا کہنا تھا کہ امریکا نے خطے میں ایک فوجی اڈہ قائم کیا ہے جس کا نام اسرائیل ہے، تاہم ایران اپنی پالیسیوں اور قومی مفادات کے دفاع کے لیے ثابت قدم رہے گا۔