اسرائیل نے فلسطینی خاتون فٹبالر رند حلوانی کو حراست میں لے لیا

(یروشلم) اسرائیلی حکام نے فلسطینی خواتین فٹبال ٹیم کی 20 سالہ کھلاڑی رند حلوانی کو حراست میں لے لیا، جس پر فلسطینی فٹبال حلقوں اور انسانی حقوق کے کارکنوں کی جانب سے تشویش کا اظہار کیا جا رہا ہے۔

فلسطینی حکام کے مطابق رند حلوانی کو منگل کے روز مغربی یروشلم کے تلپیوت پولیس اسٹیشن میں پوچھ گچھ کے لیے طلب کیا گیا تھا، جہاں سے انہیں حراست میں لے لیا گیا۔ بعد ازاں انہیں عدالت میں پیش کیا گیا، جس نے ان کی حراست میں جمعہ تک توسیع کا حکم جاری کیا۔

رپورٹس کے مطابق اسرائیلی حکام نے تاحال رند حلوانی کی گرفتاری کی وجوہات عوامی طور پر واضح نہیں کیں۔

فلسطینی فٹبال ایسوسی ایشن (پی ایف اے) نے اس اقدام کی مذمت کرتے ہوئے کہا ہے کہ یہ فلسطینی کھلاڑیوں کو منظم انداز میں نشانہ بنانے کی مسلسل پالیسی کا حصہ معلوم ہوتا ہے۔ تنظیم کے مطابق فلسطینی ایتھلیٹس کو نقل و حرکت، کھیلوں کی سرگرمیوں اور بین الاقوامی مواقع تک رسائی میں مختلف رکاوٹوں کا سامنا ہے۔

پی ایف اے کے مطابق فلسطینی خواتین کی قومی ٹیم کی سابق کھلاڑی اور بیرزیت یونیورسٹی کی طالبہ نیٹلی ابو دیا کو بھی منگل کے روز اسرائیلی فورسز نے ان کے گھر پر چھاپے کے دوران گرفتار کر لیا۔

فلسطینی فٹبال ایسوسی ایشن نے حالیہ دنوں میں فلسطینی فٹبالر مصعب ابو سالم کو اٹلی جانے سے روکنے کے واقعے کا بھی حوالہ دیا۔ تنظیم کا کہنا ہے کہ اسرائیلی حکام نے انہیں ایلنبی برج کراسنگ پر روک کر پوچھ گچھ کی اور فلسطین اسٹارز ٹیم کے ہمراہ اٹلی سفر کرنے کی اجازت نہیں دی، جہاں ٹیم نے فلسطینی عوام سے اظہارِ یکجہتی کے لیے ایک دوستانہ میچ میں شرکت کرنا تھی۔

فلسطینی حکام کے مطابق اکتوبر 2023 میں غزہ جنگ کے آغاز کے بعد سے 800 سے زائد فلسطینی کھلاڑی جان کی بازی ہار چکے ہیں۔ دوسری جانب فلسطینی قیدیوں کے امور سے متعلق اداروں کا کہنا ہے کہ اس وقت 89 فلسطینی خواتین اسرائیلی جیلوں میں قید ہیں۔

اسرائیلی حکام کی جانب سے ان دعوؤں اور گرفتاریوں کے حوالے سے تاحال کوئی تفصیلی مؤقف سامنے نہیں آیا۔