امریکا نے ایرانی فٹ بال ٹیم کو ورلڈ کپ ویزے جاری کر دیے، کچھ آفیشلز تاحال منتظر

(واشنگٹن / تہران) امریکا نے ایرانی فٹ بال ٹیم کو ورلڈ کپ مقابلوں میں شرکت کے لیے ویزے جاری کر دیے ہیں، تاہم ٹیم کے تکنیکی اور انتظامی عملے کے بعض ارکان کو تاحال ویزے جاری نہیں کیے گئے۔

برطانوی خبر رساں ادارے سے گفتگو کرتے ہوئے وائٹ ہاؤس حکام نے تصدیق کی کہ ایرانی قومی فٹ بال ٹیم کے کھلاڑیوں کو امریکا میں داخلے اور ورلڈ کپ مقابلوں میں شرکت کے لیے ویزے جاری کر دیے گئے ہیں۔

دوسری جانب ایرانی میڈیا نے رپورٹ کیا ہے کہ ٹیم کے تکنیکی اور انتظامی عملے کے کچھ ارکان کو ابھی تک امریکی ویزے موصول نہیں ہوئے، جس کے باعث ان کی ورلڈ کپ میں شرکت کے حوالے سے غیر یقینی صورتحال برقرار ہے۔

ورلڈ کپ میں ایران اپنی مہم کا آغاز 15 جون کو گروپ جی کے میچ میں نیوزی لینڈ کے خلاف کرے گا۔ یہ مقابلہ امریکی شہر لاس اینجیلس میں کھیلا جائے گا۔

ایرانی ٹیم کا دوسرا میچ بھی لاس اینجیلس میں ہوگا جہاں اسے بیلجیئم کا سامنا کرنا پڑے گا، جبکہ گروپ مرحلے کے ایک اور اہم مقابلے میں ایران سیاٹل میں مصر کے مدمقابل آئے گا۔

کھیلوں کے مبصرین کے مطابق امریکا اور ایران کے درمیان سیاسی کشیدگی کے باوجود ایرانی ٹیم کو ویزے جاری کیے جانا بین الاقوامی کھیلوں کے اصولوں اور ورلڈ کپ کے انتظامات کے حوالے سے ایک اہم پیش رفت قرار دیا جا رہا ہے۔

واضح رہے کہ امریکا میں منعقد ہونے والے عالمی مقابلوں کے لیے شریک ممالک کی ٹیموں اور آفیشلز کو بروقت سفری دستاویزات کی فراہمی ایونٹ کے کامیاب انعقاد کے لیے نہایت اہم سمجھی جاتی ہے۔