لبنانی صدر اپنے عوام کو حقیقی دشمن سے بچائیں، ایران لبنان کو سودے بازی کے لیے استعمال نہیں کر رہا: عباس عراقچی

(تہران)ایران نے لبنان کے صدر جوزف عون کی جانب سے ایران پر لگائے گئے الزامات کو مسترد کرتے ہوئے کہا ہے کہ تہران لبنان کو امریکا کے ساتھ مذاکرات میں سودے بازی کے لیے استعمال نہیں کر رہا، بلکہ لبنانی قیادت کو اپنے عوام کو حقیقی خطرات سے محفوظ بنانے پر توجہ دینی چاہیے۔

ایرانی وزیر خارجہ عباس عراقچی نے لبنانی صدر کے حالیہ بیان پر شدید ردعمل دیتے ہوئے کہا کہ ان کے بیانات سن کر ایسا محسوس ہوتا ہے جیسے لبنان کے ایک بڑے حصے پر ایران قابض ہو، لبنانی شہریوں کی نقل مکانی کا ذمہ دار ایران ہو اور روزانہ ہونے والی بمباری بھی ایران ہی کر رہا ہو۔

انہوں نے صدر جوزف عون کو مخاطب کرتے ہوئے کہا کہ لبنان کو اصل دشمن سے بچانے کی ضرورت ہے۔ اگر ایران امریکا کے ساتھ مذاکرات میں لبنان کو بطور دباؤ یا سودے بازی کا ذریعہ استعمال کرنا چاہتا تو کسی ممکنہ معاہدے تک بہت پہلے پہنچا جا سکتا تھا۔

دوسری جانب ایرانی وزارت خارجہ کے ترجمان اسماعیل بقائی نے بھی لبنانی صدر کے مؤقف پر تنقید کرتے ہوئے کہا کہ جوزف عون نے اپنے حامیوں کا ساتھ چھوڑ دیا ہے اور وہ ان عناصر کے مؤقف کی حمایت کر رہے ہیں جو لبنان کے مفادات کے خلاف کام کر رہے ہیں۔

یاد رہے کہ لبنانی صدر جوزف عون نے امریکی نشریاتی ادارے سی این این کو دیے گئے ایک حالیہ انٹرویو میں کہا تھا کہ ایران امریکا کے ساتھ جاری مذاکرات میں لبنان کو سودے بازی کے مہرے کے طور پر استعمال کر رہا ہے۔ ان کا کہنا تھا کہ تہران کو لبنان کے داخلی اور سیاسی معاملات میں مداخلت سے گریز کرنا چاہیے۔

لبنانی صدر کے بیان کے بعد تہران اور بیروت کے درمیان سفارتی تناؤ میں اضافہ دیکھنے میں آ رہا ہے، جبکہ خطے میں جاری سیاسی کشیدگی کے باعث دونوں ممالک کے بیانات کو اہم قرار دیا جا رہا ہے۔

تجزیہ کاروں کے مطابق ایران اور لبنان کے درمیان لفظی جنگ ایسے وقت میں سامنے آئی ہے جب مشرق وسطیٰ میں سفارتی سرگرمیاں تیز ہیں اور مختلف علاقائی تنازعات کے حل کے لیے مذاکراتی کوششیں جاری ہیں۔