لبنان پر اسرائیل کے تازہ ترین حملے، ، 8 افراد جاں بحق

( واشنگٹن / رائٹرز / الجزیرہ ) امریکی صدر ڈونلڈ ٹرمپ کی جانب سے نیتن یاہو کو خبردار کرنے کے باوجود اسرائیل نے منگل کے روز جنوبی لبنان کے تاریخی ساحلی شہر (ٹائر) پر فضائی حملہ کیا، جس کے نتیجے میں کم از کم آٹھ افراد ہلاک ہو گئے۔ یہ حملہ ایسے وقت میں ہوا ہے جب امریکا، ایران اور اسرائیل کے درمیان وسیع تر تنازع کے خاتمے کے لیے سفارتی کوششیں جاری ہیں۔

لبنان کی وزارتِ صحت کے مطابق شہر کے مشرقی علاقے میں ہونے والے ایک فضائی حملے میں تمام آٹھ افراد جان کی بازی ہار گئے۔ اسرائیل نے حملے سے قبل شہر کے بعض علاقوں کے لیے انخلا کا حکم جاری کیا تھا، جس کے بعد متعدد شہری محفوظ مقامات کی جانب منتقل ہو گئے۔ سرکاری میڈیا کے مطابق سول ڈیفنس کی ٹیموں نے بزرگ افراد کو عارضی پناہ گاہوں میں منتقل کیا

یہ حملے مارچ میں لبنان میں جنگ کے آغاز کے بعد سے ٹائر شہر پر ہونے والے مہلک ترین حملوں میں شمار کیے جا رہے ہیں۔ حزب اللہ نے مارچ میں ایران کی حمایت میں اسرائیل پر راکٹ حملے شروع کیے تھے، جس کے بعد سرحدی جھڑپیں وسیع جنگ میں تبدیل ہو گئیں

دوسری جانب امریکی صدر ڈونلڈ ٹرمپ کی اپیل کے بعد پیر کو ایران اور اسرائیل نے ایک دوسرے پر براہِ راست حملے روک دیے تھے، تاہم تہران نے خبردار کیا ہے کہ اگر اسرائیل نے لبنان میں حزب اللہ کے خلاف کارروائیاں جاری رکھیں تو ایران دوبارہ جوابی اقدامات شروع کر سکتا ہے۔

اسرائیل کی لبنان میں جاری فوجی مہم ٹرمپ انتظامیہ کی امن کوششوں کے لیے ایک بڑی رکاوٹ بن رہی ہے۔ ایران مسلسل مطالبہ کر رہا ہے کہ کسی بھی جامع امن معاہدے سے قبل لبنان میں اسرائیلی کارروائیاں بند کی جائیں

ادھر آبنائے ہرمز کے قریب ایک امریکی اے ایچ-64 اپاچی ہیلی کاپٹر حادثے کا شکار ہو گیا۔ امریکی فوج کے مطابق ہیلی کاپٹر منگل کی علی الصبح عمان کے ساحل کے قریب گر کر تباہ ہوا۔ امریکی بحریہ کے ایک ڈرون نے دونوں پائلٹوں کو تلاش کر کے بحفاظت ریسکیو کر لیا

امریکی حکام نے ابھی تک یہ واضح نہیں کیا کہ ہیلی کاپٹر ایرانی فائرنگ کا نشانہ بنا، کسی تکنیکی خرابی کا شکار ہوا یا حادثے کی کوئی اور وجہ تھی۔ صدر ٹرمپ نے صحافیوں سے گفتگو میں کہا کہ دونوں پائلٹ محفوظ ہیں اور کسی کو چوٹ نہیں آئی، جبکہ امریکی سینٹرل کمانڈ (سینٹکام) نے بتایا کہ عملے کو تقریباً دو گھنٹوں کے اندر ریسکیو کر لیا گیا تھا اور ان کی حالت مستحکم ہے۔

ایران میں بھی منگل کو دو فضائی دفاعی اہلکاروں کی تدفین کی جا رہی ہے جو ایک روز قبل اسرائیلی حملوں میں مارے گئے تھے۔ ایرانی حملوں کے نتیجے میں اسرائیل میں کسی جانی نقصان کی اطلاع نہیں ملی۔

ایران اور اسرائیل کے درمیان براہِ راست حملوں میں عارضی وقفے کے بعد عالمی منڈی میں تیل کی قیمتوں میں بھی کمی دیکھی گئی۔ اس سے قبل دونوں ممالک کے درمیان کشیدگی کے باعث خام تیل کی قیمتوں میں اضافہ ریکارڈ کیا گیا تھا

صدر ٹرمپ نے اس امید کا اظہار کیا ہے کہ آئندہ چند روز میں ایران کے ساتھ کسی ممکنہ معاہدے کی صورت سامنے آ سکتی ہے، تاہم انہوں نے مزید تفصیلات فراہم نہیں کیں۔ امریکی اور اسرائیلی حکام کے مطابق ٹرمپ اور اسرائیلی وزیرِ اعظم نیتن یاہو کے درمیان پیر کو ٹیلیفونک رابطہ بھی ہوا۔

امریکی میڈیا کو دیے گئے ایک انٹرویو میں صدر ٹرمپ نے انکشاف کیا کہ انہوں نے نیتن یاہو کو خبردار کیا تھا کہ ایران کے ساتھ دوبارہ جنگ شروع کرنے سے گریز کریں، ورنہ اسرائیل کو تنہا صورتحال کا سامنا کرنا پڑ سکتا ہے۔

ایران کا مؤقف ہے کہ امریکا کے ساتھ کسی بھی امن معاہدے کے لیے لبنان میں جنگ کا خاتمہ، بین الاقوامی پابندیوں کا خاتمہ، اربوں ڈالر مالیت کے منجمد ایرانی اثاثوں کی رہائی اور آبنائے ہرمز پر ایران کے کنٹرول کو تسلیم کرنا ضروری ہوگا۔

دریں اثنا، اسرائیل کا کہنا ہے کہ لبنان میں اس کی کارروائیاں ایران کے ساتھ جنگ بندی سے الگ معاملہ ہیں اور حزب اللہ کے خلاف آپریشن جاری رہیں گے۔ دوسری جانب حزب اللہ نے بھی اسرائیل پر اپنے حملے مکمل طور پر بند نہیں کیے۔

تجزیہ کاروں کے مطابق لبنان میں جاری لڑائی اور آبنائے ہرمز میں کشیدگی خطے میں کسی بھی ممکنہ امن معاہدے کے لیے بدستور بڑے چیلنجز بنے ہوئے ہیں