چین کی امریکا ایران مذاکرات میں پاکستان کے کردار کی حمایت، اسحاق ڈار کی چینی سفیر سے ملاقات

(اسلام آباد) امریکا اور ایران کے درمیان جاری سفارتی کوششوں میں چین نے پاکستان کے کردار کی مکمل حمایت کا اعلان کر دیا ہے۔

وزارت خارجہ کے مطابق نائب وزیراعظم و وزیر خارجہ اسحاق ڈار نے پاکستان میں چین کے سفیر جیانگ زائی دونگ سے ملاقات کی جس میں خطے کی مجموعی صورتحال اور امریکا ایران مذاکرات پر تفصیلی تبادلہ خیال کیا گیا۔

وزارت خارجہ کے جاری بیان کے مطابق ملاقات کے دوران چینی سفیر نے امریکا اور ایران کے درمیان رابطوں کے فروغ کے لیے پاکستان کی مسلسل کوششوں کو سراہا اور کہا کہ یہ اقدامات خطے میں پائیدار امن اور استحکام کے لیے نہایت اہم ہیں۔

چینی سفیر جیانگ زائی دونگ نے امریکا ایران رابطوں میں پاکستان کے مثبت کردار پر اظہارِ تحسین کرتے ہوئے کہا کہ چین خطے میں امن و استحکام کے لیے پاکستان کی کوششوں کی مکمل حمایت کرتا ہے۔

دفتر خارجہ کے مطابق ملاقات میں پاکستان اور چین کے درمیان آل ویدر اسٹریٹجک کوآپریٹو پارٹنرشپ کو مزید مضبوط بنانے پر بھی زور دیا گیا جبکہ دونوں ممالک نے اعلیٰ سطح کے روابط جاری رکھنے اور دوطرفہ تعاون بڑھانے کے عزم کا اظہار کیا۔

ملاقات میں دونوں ممالک نے خطے میں امن، استحکام اور سفارتی حل کی اہمیت پر بھی اتفاق کیا۔