گلگت بلتستان انتخابات: پیپلزپارٹی 6 نشستوں کے ساتھ آگے، 5 آزاد امیدوار کامیاب

گلگت بلتستان کے عام انتخابات میں ووٹوں کی گنتی کا عمل جاری ہے اور اب تک موصول ہونے والے غیرسرکاری اور غیرحتمی نتائج کے مطابق پاکستان پیپلزپارٹی نے برتری حاصل کر لی ہے۔

24 جنرل نشستوں میں سے 14 حلقوں کے نتائج سامنے آ چکے ہیں، جن کے مطابق پاکستان پیپلزپارٹی 6 نشستوں پر کامیابی حاصل کر کے سب سے بڑی جماعت بن کر ابھری ہے۔ دوسری جانب مسلم لیگ (ن) کے 2 امیدوار کامیاب ہوئے ہیں، جبکہ مجلس وحدت مسلمین ایک نشست جیتنے میں کامیاب رہی ہے۔ اب تک 5 آزاد امیدوار بھی کامیابی حاصل کر چکے ہیں۔

جی بی اے 2 گلگت میں مسلم لیگ (ن) کے حفیظ الرحمان 11,204 ووٹ حاصل کر کے کامیاب قرار پائے، جبکہ پیپلزپارٹی کے جمیل احمد 7,376 ووٹوں کے ساتھ دوسرے نمبر پر رہے۔

جی بی اے 3 گلگت میں آزاد امیدوار سید سہیل عباس نے 7,853 ووٹ حاصل کر کے کامیابی حاصل کی، جبکہ پیپلزپارٹی کے آفتاب حیدر 7,434 ووٹ لے کر دوسرے نمبر پر رہے۔

جی بی اے 4 نگر میں پیپلزپارٹی کے محمد علی اختر 7,670 ووٹ لے کر فاتح قرار پائے، جبکہ اسلامی تحریک کے محمد ایوب وزیری 6,566 ووٹوں کے ساتھ دوسرے نمبر پر رہے۔

جی بی اے 6 ہنزہ میں آزاد امیدوار نیک نام کریم 6,390 ووٹ حاصل کر کے کامیاب ہوئے، جبکہ پیپلزپارٹی کے امتیاز الحق 5,417 ووٹ لے کر دوسرے نمبر پر رہے۔

جی بی اے 7 اسکردو میں پیپلزپارٹی کے توقیر مہدی شاہ 4,320 ووٹ لے کر کامیاب قرار پائے، جبکہ آئی پی پی کے راجا جلال حسین 3,891 ووٹوں کے ساتھ دوسرے نمبر پر رہے۔

جی بی اے 11 کھرمنگ میں پیپلزپارٹی کے اقبال حسن نے 6,141 ووٹ حاصل کیے اور کامیاب ہوئے، جبکہ مسلم لیگ (ن) کے محسن رضوی 4,170 ووٹ لے کر دوسرے نمبر پر رہے۔

جی بی اے 12 شگر میں پیپلزپارٹی کے عمران ندیم نے 12,179 ووٹ حاصل کر کے واضح کامیابی حاصل کی، جبکہ اسلامی تحریک پاکستان کے راجا اعظم خان 7,700 ووٹوں کے ساتھ دوسرے نمبر پر رہے۔

انتخابی نتائج کے مزید آنے کے ساتھ گلگت بلتستان میں حکومت سازی کی تصویر بھی واضح ہوتی جا رہی ہے۔ سیاسی مبصرین کے مطابق آزاد امیدواروں کی حمایت آئندہ حکومت کی تشکیل میں اہم کردار ادا کر سکتی ہے۔