جنگ بندی 22 اپریل صبح 4 بج کر 50 منٹ پر ختم ہو جائے گی,ایرانی وفد کے جواب کا انتظار ہے

(اسلام آباد) عطا تارڑ نے کہا ہے کہ ایرانی وفد کی اسلام آباد میں مجوزہ امن مذاکرات میں شرکت کے حوالے سے باضابطہ جواب کا انتظار ہے۔

سماجی رابطے کی ویب سائٹ ایکس پر جاری اپنے بیان میں وفاقی وزیر اطلاعات نے کہا کہ پاکستان بطور ثالث ایرانی حکام سے مسلسل رابطے میں ہے اور سفارت کاری و مذاکرات کے عمل کو آگے بڑھانے کیلئے کوششیں جاری ہیں۔

عطا تارڑ کے مطابق جنگ بندی 22 اپریل صبح 4 بج کر 50 منٹ پر ختم ہو جائے گی، اس لیے جنگ بندی کے خاتمے سے قبل ایران کا مذاکرات میں شرکت کا فیصلہ انتہائی اہمیت کا حامل ہے۔

انہوں نے کہا کہ پاکستان نے ایرانی قیادت کو مذاکرات پر آمادہ کرنے کیلئے مخلصانہ سفارتی کوششیں کی ہیں اور خطے میں امن و استحکام کیلئے اپنا کردار جاری رکھے گا۔

وفاقی وزیر اطلاعات کا مزید کہنا تھا کہ پاکستان سفارتی حل کو ترجیح دیتا ہے اور امید ہے کہ مذاکرات کے ذریعے کشیدگی میں کمی آئے گی۔