ایران یا لبنان کے خلاف اسرائیلی کارروائی ناقابل قبول، نئی کارروائی کا تباہ کن جواب دیا جائے گا: عباس عراقچی

(تہران) ایرانی وزیر خارجہ عباس عراقچی نے اسرائیل کی جانب سے ایران پر مبینہ تازہ حملوں کے بعد سخت ردعمل دیتے ہوئے کہا ہے کہ ایران یا لبنان کے خلاف کسی بھی قسم کی اسرائیلی کارروائی ناقابل قبول ہے اور ایسی کسی نئی کارروائی کا تباہ کن جواب دیا جائے گا۔

اپنے بیان میں عباس عراقچی نے کہا کہ خطے میں بڑھتی ہوئی کشیدگی کی مکمل ذمہ داری اسرائیل پر عائد ہوتی ہے۔ ان کا مؤقف تھا کہ ایرانی مسلح افواج کی جانب سے کی گئی کارروائیاں دفاعی نوعیت کی تھیں اور ان کا مقصد ملکی سلامتی کا تحفظ تھا۔

ایرانی وزیر خارجہ نے مزید کہا کہ لبنان میں جنگ بندی اپریل کے معاہدے کا ایک اہم حصہ تھی اور اسرائیلی اقدامات خطے کے امن و استحکام کے لیے خطرہ بن رہے ہیں۔

دوسری جانب اسرائیلی فوج نے دعویٰ کیا ہے کہ یمن سے اسرائیل کی جانب میزائل داغے گئے ہیں، جنہیں روکنے کے لیے فضائی دفاعی نظام متحرک ہے۔ اسرائیلی حکام کے مطابق دفاعی نظام میزائل حملوں کو ناکام بنانے کی کوشش کر رہا ہے۔

اس سے قبل اسرائیل نے ایران کی جانب سے ہونے والے حملوں کے جواب میں ایران کے مختلف علاقوں کو نشانہ بنانے کا دعویٰ کیا تھا۔ ایرانی میڈیا اور عینی شاہدین کے مطابق تہران، تبریز اور اصفہان میں دھماکوں کی آوازیں سنی گئیں، تاہم نقصانات اور ہلاکتوں کے بارے میں فوری طور پر کوئی مصدقہ تفصیلات سامنے نہیں آئیں۔

مشرق وسطیٰ میں جاری کشیدگی کے باعث عالمی برادری صورتحال پر گہری نظر رکھے ہوئے ہے، جبکہ مختلف ممالک نے تمام فریقین سے تحمل کا مظاہرہ کرنے اور تنازع کو مزید بڑھنے سے روکنے کی اپیل کی ہے۔