وزیراعظم شہباز شریف، فیلڈ مارشل عاصم منیر اور اسحاق ڈار کے کردار سے پاکستانی پاسپورٹ کی عزت بحال ہوئی,نواز شریف

(اسلام آباد)نواز شریف نے کہا ہے کہ وزیراعظم شہباز شریف، فیلڈ مارشل سید عاصم منیر اور نائب وزیراعظم و وزیر خارجہ اسحاق ڈار کے تاریخی کردار سے پاکستانی سبز پاسپورٹ کی عزت بحال ہوئی ہے۔

پاکستان مسلم لیگ (ن) کے صدر نواز شریف نے گلگت بلتستان پارلیمانی بورڈ کے اجلاس سے خطاب کرتے ہوئے کہا کہ مسلم لیگ (ن) سے زیادہ کوئی بھی گلگت بلتستان کو نہیں جانتا۔

انہوں نے کہا کہ سڑکوں کی تعمیر کوئی احسان نہیں بلکہ عوام کی بنیادی ضرورت ہے اور حکومت نے اس ضرورت کو مدنظر رکھتے ہوئے عملی اقدامات کیے ہیں۔ نواز شریف کا کہنا تھا کہ بطور وزیراعظم شہباز شریف گلگت بلتستان کی ترقی پر خصوصی توجہ دے رہے ہیں اور ان کا جذبہ بھی اس خطے کیلئے ویسا ہی ہے جیسا ان کا اپنا ہے۔

سابق وزیراعظم نے کہا کہ مسلم لیگ (ن) عوامی خدمت پر یقین رکھتی ہے اور دفاعی، سیاسی اور معاشی میدان میں بھرپور کردار ادا کر چکی ہے۔ انہوں نے بتایا کہ گلگت بلتستان میں 60 ارب روپے سے زائد لاگت سے سڑکوں کے منصوبے مکمل کیے جا رہے ہیں جس سے فاصلے کم ہوئے اور سیاحت کو فروغ ملا ہے۔

نواز شریف نے مزید کہا کہ ان منصوبوں کے باعث دنیا بھر سے سیاح گلگت بلتستان کا رخ کر رہے ہیں۔ ان کا کہنا تھا کہ مسلم لیگ (ن) نے صرف دعوے نہیں کیے بلکہ عملی کام کر کے دکھائے ہیں جبکہ اسلام آباد اور پنجاب میں بھی بڑے پیمانے پر ترقیاتی منصوبے جاری ہیں۔

انہوں نے خیبر پختونخوا کا حوالہ دیتے ہوئے کہا کہ وہاں 15 سال سے مسلسل ایک ہی جماعت کی حکومت ہے، تاہم عوامی فلاح کے حوالے سے نمایاں کام نظر نہیں آ رہے۔