ایران بات چیت کرنا چاہتا ہے، بااختیار لوگوں سے مذاکرات جاری ہیں: ٹرمپ

(واشنگٹن) برطانوی خبر ایجنسی سے گفتگو کرتے ہوئے ڈونلڈ ٹرمپ نے کہا کہ دیکھنا یہ ہے کہ ایران کے ساتھ معاہدہ ہو سکتا ہے یا نہیں، اور تہران کس نوعیت کی پیش کش سامنے لاتا ہے۔

انہوں نے کہا کہ ایران کسی معاہدے تک پہنچنے کیلئے بات چیت کرنا چاہتا ہے اور امریکی مطالبات کے مطابق پیش رفت کی خواہش رکھتا ہے۔ ٹرمپ کے مطابق امریکا ایران میں ان افراد سے مذاکرات کر رہا ہے جو فیصلے کرنے کی صلاحیت رکھتے ہیں۔

دوسری جانب امریکی وزیر خارجہ مارکو روبیو نے کہا کہ امریکا ایران پر معاشی دباؤ مزید بڑھا رہا ہے اور ایران کی غیر قانونی تیل تجارت کو روکنے کیلئے فیصلہ کن اقدامات کیے جا رہے ہیں۔

مارکو روبیو کے مطابق ایران کی تجارت کو سہارا دینے والے نیٹ ورکس پر دباؤ میں اضافہ کیا جائے گا، جبکہ یہ اقدامات "آپریشن اکنامک فیوری" کا حصہ ہیں۔

امریکی محکمہ خزانہ نے بھی ایران پر نئی پابندیوں کا اعلان کرتے ہوئے چین میں قائم ایک آئل ریفائنری، 40 شپنگ کمپنیوں اور متعدد آئل ٹینکرز پر پابندیاں عائد کر دی ہیں۔ یہ پابندیاں ان اداروں پر لگائی گئی ہیں جو ایران کے ساتھ کاروبار اور تیل کی ترسیل میں ملوث ہیں۔

ادھر امریکی سینٹ کام کے مطابق امریکی فوج نے ایرانی پرچم والے ایک اور بحری جہاز کو روک لیا، جسے ناکہ بندی کی خلاف ورزی پر روکا گیا۔ حکام کے مطابق یہ جہاز ایرانی بندرگاہ کی جانب جا رہا تھا۔