امریکا ایران مذاکرات: منجمد اثاثوں کے معاملے پر پیشرفت، محسن نقوی آج تہران پہنچیں گے

امریکا اور ایران کے درمیان مذاکرات اور ایرانی منجمد اثاثوں کے معاملے پر اہم پیشرفت سامنے آئی ہے، جبکہ وفاقی وزیر داخلہ محسن نقوی آج ایران کے دارالحکومت تہران کا دورہ کریں گے۔

عرب میڈیا کے مطابق محسن نقوی تہران میں ایرانی حکام کے ساتھ ملاقاتوں کے دوران ایک مجوزہ مفاہمتی یادداشت تک پہنچنے کے طریقہ کار اور دیگر اہم امور پر تبادلہ خیال کریں گے۔

ذرائع کا کہنا ہے کہ ایران کے منجمد فنڈز کے معاملے میں پیشرفت ضرور ہوئی ہے، تاہم فنڈز کے حجم اور ان کے اجرا کے وقت سے متعلق دونوں فریقین کے درمیان اختلافات اب بھی برقرار ہیں۔

ذرائع کے مطابق امریکی صدر ڈونلڈ ٹرمپ نے ثالثی کردار ادا کرنے والے فریقوں کو آگاہ کیا ہے کہ مذاکرات کا عمل 60 دن سے زیادہ نہیں چلے گا اور اب ایران پر منحصر ہے کہ وہ جلد اپنے مؤقف سے آگاہ کرے۔

یاد رہے کہ محسن نقوی گزشتہ دو روز کے دوران ایرانی حکام کے ساتھ متعدد ملاقاتیں کر چکے ہیں۔ ان ملاقاتوں میں دوطرفہ تعلقات، علاقائی سلامتی اور باہمی دلچسپی کے مختلف امور زیر بحث آئے۔

وفاقی وزیر داخلہ محسن نقوی نے اپنے بیان میں بتایا کہ انہوں نے ایرانی وزیر داخلہ اسکندر مومنی سے دوبارہ ملاقات کی، جس میں خطے کی سیکیورٹی صورتحال کا جائزہ لیا گیا اور مشترکہ مفادات کے مختلف امور پر تفصیلی گفتگو ہوئی۔

تجزیہ کاروں کے مطابق محسن نقوی کا دورہ ایسے وقت میں ہو رہا ہے جب امریکا اور ایران کے درمیان مالی اور سفارتی معاملات پر رابطے جاری ہیں، جس کے باعث اس دورے کو خطے کی سفارتی سرگرمیوں کے تناظر میں اہم قرار دیا جا رہا ہے۔