پیٹر مینڈلسن کی بطور سفیر تعیناتی پر برطانوی وزیراعظم کی معافی،

(لندن) برطانوی وزیراعظم کیئر سٹارمر نے جیفری ایپسٹین کے ساتھ تعلقات رکھنے والے پیٹر مینڈلسن کو امریکا میں بطور سفیر تعینات کرنے پر معافی مانگ لی ہے۔

یہ پیش رفت پیٹر مینڈلسن کے بدنام زمانہ شخصیت جیفری ایپسٹین سے قریبی تعلقات سامنے آنے کے بعد بڑھتے ہوئے عوامی دباؤ کے پس منظر میں سامنے آئی ہے۔

پارلیمنٹ سے خطاب کے دوران کیئر سٹارمر نے کہا کہ یہ معلوم تھا کہ پیٹر مینڈلسن جیفری ایپسٹین کو جانتے تھے، تاہم اس تعلق کی گہرائی اور نوعیت کے بارے میں مکمل آگاہی نہیں تھی۔

وزیراعظم کیئر سٹارمر نے دسمبر 2024 میں پیٹر مینڈلسن کو امریکا میں برطانوی سفیر مقرر کیا تھا۔ انہوں نے متاثرین کو مخاطب کرتے ہوئے مینڈلسن کی تقرری پر معذرت کا اظہار کیا۔

سٹارمر نے گزشتہ برس ستمبر میں پیٹر مینڈلسن کو برطرف کر دیا تھا، جب منظر عام پر آنے والی ای میلز سے ظاہر ہوا کہ وہ 2008 میں کمسن افراد سے متعلق جنسی جرائم میں سزا یافتہ جیفری ایپسٹین کے ساتھ رابطے میں تھے۔

تاہم امریکی محکمہ انصاف کی جانب سے جاری نئی دستاویزات کے بعد اس معاملے نے دوبارہ شدت اختیار کر لی ہے، جن میں پیٹر مینڈلسن اور جیفری ایپسٹین کے قریبی تعلقات کی مزید تفصیلات سامنے آئی ہیں۔

دستاویزات میں یہ بھی اشارہ دیا گیا ہے کہ پیٹر مینڈلسن نے مبینہ طور پر سرکاری دستاویزات ایپسٹین کو فراہم کیں جبکہ جیفری ایپسٹین نے مینڈلسن یا ان کے اس وقت کے پارٹنر کو ادائیگیوں کا ریکارڈ بھی رکھا۔

اختیارات کے ناجائز استعمال کے الزام میں پولیس تحقیقات کا سامنا کرنے والے پیٹر مینڈلسن نے کہا ہے کہ انہیں کسی ادائیگی کی یاد نہیں اور انہوں نے دستاویزات لیک کرنے کے الزامات پر عوامی طور پر کوئی تبصرہ نہیں کیا۔

دوسری جانب وزیراعظم کیئر سٹارمر کو اس معاملے پر شدید تنقید کا سامنا ہے۔ انہوں نے پہلے تقرری کے وقت کی جانچ پڑتال کی تفصیلات جاری کرنے کا وعدہ کیا تھا، تاہم اب ان کا کہنا ہے کہ پولیس کی درخواست پر یہ معلومات جاری نہیں کی جا سکتیں تاکہ تحقیقات متاثر نہ ہوں۔