بنوں سے دہشتگردوں نے 3 پولیو ورکرز کو اغوا کرلیا

(بنوں )بنوں میں دہشتگردوں نے تین پولیو ورکرز کو اغوا کر لیا، جس کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا۔

پولیس کے مطابق علاقہ جھنڈوخیل سے دہشتگردوں نے تین پولیو ورکرز کریم اللہ، مشکوٰۃ اللہ اور شاہ زیب کو اغوا کر لیا، جو پولیو ڈیوٹی کیلئے گئے ہوئے تھے۔

پولیس حکام کا کہنا ہے کہ دہشتگردوں نے پولیو ورکرز کو بی ایچ یو غازی مرجان سے اغوا کیا۔ واقعے کی اطلاع ملتے ہی پولیس اور سکیورٹی فورسز نے فوری کارروائی کرتے ہوئے علاقے کو گھیرے میں لے لیا۔

سرچ آپریشن جاری

پولیس کے مطابق اغوا ہونے والے پولیو ورکرز کی بازیابی کیلئے سرچ آپریشن شروع کر دیا گیا ہے جبکہ علاقے میں سکیورٹی مزید سخت کر دی گئی ہے۔

واضح رہے کہ خیبرپختونخوا میں پولیو ٹیموں کو ماضی میں بھی سکیورٹی خدشات کا سامنا رہا ہے، تاہم حکومت کی جانب سے انسداد پولیو مہم جاری رکھنے کے عزم کا اعادہ کیا گیا ہے۔