ایران دباؤ میں نہیں آئے گا، امریکا ہتھیار ڈالنے پر مجبور کرنا چاہتا ہے: صدر مسعود پزشکیان

(تہران) ایرانی صدر مسعود پزشکیان نے امریکا پر کڑی تنقید کرتے ہوئے کہا ہے کہ ایران کے غیور عوام کسی صورت دباؤ کے آگے نہیں جھکیں گے اور امریکا ایران کو ہتھیار ڈالنے پر مجبور کرنا چاہتا ہے۔

سوشل میڈیا پر جاری اپنے بیان میں ایرانی صدر مسعود پزشکیان کا کہنا تھا کہ وعدوں اور معاہدوں کی پاسداری ہی بامقصد مذاکرات کی بنیاد ہوتی ہے، تاہم امریکا اور ایران کے درمیان اعتماد کا شدید فقدان رہا ہے۔

انہوں نے کہا کہ ایرانی عوام امریکی حکومت کے رویے سے بخوبی آگاہ ہیں، امریکا کی جانب سے ملنے والے غیر تعمیری اور متضاد اشارے انتہائی تلخ پیغام دے رہے ہیں۔ ان کا مزید کہنا تھا کہ ایران دباؤ کی پالیسی قبول نہیں کرے گا اور اپنے قومی مفادات پر کسی قسم کا سمجھوتہ نہیں کیا جائے گا۔

دوسری جانب ایرانی نائب وزیر خارجہ سعید خطیب زادہ نے بھی امریکی صدر ڈونلڈ ٹرمپ کے بیانات پر ردعمل دیتے ہوئے کہا کہ صدر ٹرمپ تضادات سے بھرپور بیانات دینے کے عادی ہیں اور ان کے بیانات اس قابل نہیں کہ ان پر توجہ دی جائے۔

سعید خطیب زادہ کا کہنا تھا کہ امریکا کو اپنا لالچی رویہ ترک کرنا ہوگا، اس کے علاوہ کوئی دوسرا راستہ نہیں، امریکا کو ہر صورت ایرانی عوام کے حقوق کا مکمل احترام کرنا ہوگا۔

انہوں نے مزید کہا کہ ایران ہمیشہ بامقصد اور باعزت مذاکرات کا حامی رہا ہے، تاہم دباؤ یا دھمکیوں کے ذریعے کوئی بھی معاہدہ ممکن نہیں۔